سيدي لا بأس

ابتدي باسم الله الواحد الفرد الغفور
ربنا اللي خالق الأرض واللي حولها
عالم الأسرار فالكون وأسرار الصدور
خالق اجناس البشر باختلاف عقولها
مرسل محمد يبدل ظلام الناس نور
لين شع النور في عرض الأرض وطولها
نعبده وحده وما نشرك ولا نشهد بزور
كلمة التوحيد ما يختلف مدلولها
والبداية بعدها فاحت انسام العطور
والقصيدة مزنة «ن» سيلت بسيولها
قوم يا هاجس قصيدي ترى منت معذور
دق بيبان الجزالة وفك اقفولها
وش تحرى وانت حاصل على رخصة عبور
رخصة «ن» ما تنتهي ساري «ن» مفعولها
احذر من النقد واحذر يجي حولك قصور
الجمال الله خلقها تشيل احمولها
والقصيد يطيب ويزين في صقر الصقور
في زعيم المملكة والعرب وزحولها
خادم البيتين واعظم شرف واعز دور
خدمته للي من اقصى الاراضي جولها
حاكم «ن» عادل وله شور يغلب كل شور
كلمته لاقالها للعرب فزولها
فيه عزم وجزم طبعه على الشدة صبور
فيه حلم وعلم ومعامله بوصولها
منهجه واضح لا يمكن يلف ولا يدور
الحوادث والمشاكل يجيب حلولها
مرهف الاحساس قلبه على شعبه غيور
دمعته يسبق دموع اليتيم نزولها
غيبته ساعة عن الدار نحسبها شهور
ورحلته يفرح بها الشعب يوم وصولها
عودته معها الفرح عاد ويعود السرور
كل شعبه جيته سيدي صفو لها
سيدي لا بأس واللي حصل اجر وطهور
كل واحد فيه غيره ودين يقولها
انت عز المملكة وانت للاسلام سور
غيرك انته بعد رب البشر من هولها
عشت يا فخر الوطن والمواطن بك فخور
سيدي فعلك فخر للعرب وفعولها
يا حبيب الشعب يالشامخ الشهم الوقور
الشعر لو طال قامتك صعب يطولها
الله انه يحفظك من صواديف الشرور
دعوة «ن» عندك يا رب العباد قبولها
وعشت يا سلطان يا صاحب القلب الجسور
يا عقيد الحرب لادندنت بطبولها
ابتساماتك على دربنا تزرع زهور
والكرم سحايب «ن» من يدك هملولها
وعشت يا نايف طويل العمر واف الشبور
نايب «ن» ثاني وقد الثقة وتنولها
يا كريم الاصل والساس والبيت امعمور
يا وزير الداخلية ويا مسؤولها
يا عيال موحد الدار بالسيف البتور
قبل لا يظهر على سطحها بترولها
الله انه يرحمه والسكن جنات حور
ويشمله بالعفو في ساعة «ن» يا هولها
انتم صقور العرب وانتم ولاة الامور
حبكم بقلوبنا شجرة «ن» محصولها
الفدا والانتماء والولاء طول الدهور
ما تغيرنا سنين الزمن وفصولها
شعبكم في صف واحد ومعكم ما يبور
فدوة «ن» للارض وجبالها وسهولها
ضد لاصحاب التطرف وسكان الحجور
شلة «ن» على بلدنا تعن خيولها
شلة الارهاب وايامهم سودا دبور
فتنة «ن» نقضي على راسها ورجولها
ولولي الامر طاعة ليا يوم النشور
والحقيقة كلما الحق جيت اقولها
جيت امثل عزوة سليم غياب وحضور
عزوة «ن» ما يختلف فعلها عن قولها
القبيلة كلها عندها نفس الشعور
كلفتني بالرسالة وانا مرسولها