معوكس

*الاخ معوكس المحترم ماهو رايك في تغريدات عضو اتحاد كرة القدم الدكتور عبداللطيف بخاري؟
ناصر الدوسري - الرياض
* خذها مني .. المرة الجاية تبي تشتغل عنده حاسة السمع إذا الجماعة سكتوا.
*الدكتور معوكس بعد التحية والاحترام صحيح أن الهلال تعرض لنقد قاسي من بعض المحللين خلال مباراة التعاون على الرغم من فوز «الأزرق»؟
عبدالله العتيبي - شقراء
* ما غيره كرافتة موروينو ما عنده الا «الاتفكاك» والشكيك بالجزائيات.
*الكابتن والناقد الكبير معكوس بعد التحية والاحترام ما تقييمك لمستوى المحترفين الأجانب للموسم الحالي ؟
فهد العنزي- تبوك
* مافيه الا ابو خطاب السومة اللي يبرد القلب ويسجل الاهداف يمين ويسار وتحت وفوق الحيطة.
*ابو العواكيس المحترم بحكم خبرتك الرياضية في الرياضة السعودية هل سبق وان مرت عليك حالات شم في الدوري السعودي؟
بندر الحربي - بريدة
* منذ عهد الجمل وحنا نشم ونشوف ونسمع بس خلها مستورة.
* صاحب المليون رسالة معوكس وش توقعاتك لسامي الجابر وهل سيصمد مع الشباب في ظل هذه الظروف الصعبة جداً؟
أحمد الخالدي - الرياض
* الذيب ما ينخاف عليه.. دربه خضر.
* المستشار معوكس بعد التحية والاحترام من وجهة نظرك ماهي الاسباب الرئيسية في الحضور الضعيف في دورة الالعاب الاولمبية في البرازيل؟
خالد الرشيد - الرياض
* مخلد قدم الوصفة والصقر ضاع، ومع المدير التنفيذي الله يستر.
* الاخ معوكس المحترم ماتلاحظ ان حسين عبدالغني يكبر وتكثر مشاكله يوم مع المدرب ويوم مع الاداري ويوم مع لاعبي الخصم ويوم مع المشجع حتى الاعلاميين ماخلهم وش الحل معه.
فهد القحطاني - المزاحمية
مادام الإدارة راضية عنه خله يلعب لعبته واذا صفا لك زمانك عل ياظامي.
*ابو العواكيس بعد التحية والاحترام وش تقييمك الفني لمستوى «دوري جميل» حتى الان ومن من الفرق شد انتباهك؟
طارق البيشي - الخرج
* ما شد انتباهي إلا كرافتة بعض المحللين كنها لفحات ددسن، والشعر اللماع.
* الاخ معوكس المحترم ما رايك في فريق التعاون وهل تتوقع يتغير حاله للأفضل بعد فترة التوقف؟
يوسف الحديثي -بريدة
* التعاون فكر في آسيا وشكله بيلعب «الملحق» مثل جاره.
*مستشار الرياضة الدكتور معوكس بعد التحية والاحترام ماهي توقعاتك للمنتخب في التصفيات الحاسمة للتأهل لكأس العالم 2018 في روسيا؟
فيصل اليامي - أبها
-لاعبو «الأخضر» ماينقصهم شىء والوطن كله يقف خلفهم وكل اللي نبيه منهم يشمون ويحسون شوية بالشعار الغالي.
* صديق الجميع أبو العواكيس المحترم وش رايك في الاتحاد وهل تتوقع عودته مع الرئيس الذهبي أحمد مسعود لمنصات التتويج؟
جهاد أمين - جدة
* ابو عمر كشف اصحاب الشيكات المفتوحة وخلاهم يختفون.
*الأخ معوكس بعد التحية والاحترام ماتلاحظ ان انتخابات الاتحادات الرياضية بدت وانتهت لاحس ولا خبر وش تعليقك؟
محمد العمر -الرياض
* وش هالانتخابات اللي كلها بالتزكية والتعيين وآخرتها المدير التنفيذي هو الرئيس.
*أبو العواكيس المحترم بحكم خبرتك الفنية من تتوقع أول مدرب يلغى عقده في «دوري جميل»؟
خالد المسردي - المجمعة
* اذا ماضبط زوران أموره مع حسين وضعه صعب.
* العزيز معوكس ياخي افتينا بعض الناس ماتدري هو حكم او عضو لجنة انضباط سابق او حامل شال لناديه.
حمود الدهمشي- عرع
* وتلقاه طول عمره ساقط ب»الكوبر» ويقول خذيت الأول.
* الاستاذ معوكس وش الدوافع التي جعلت رئيس اللجنة يعترف ببعض اخطاء الحكام ويسكت عن الأخرى.
عبدالعزيز العجمي- الدمام
* يانت اقشر صدق.. تبي الانذار يوصله حد بيته.
* بشرنا ياخ معكوس كيف حاسة الشم عندك.. احس ان شماتك قوية ويارب نشوف نتائجها في اولمبياد طوكيو؟
محمد ابو قاسم- جدة
* صورة مع التحية لدكتور الشم لموافاة ابو قاسم بالنتيجة عاجلا.
* حبيبنا معوكس كيف تصف لنا حال اللي وهقهم دكتور الشم يوم قلب على فرقهم وكشف المستور؟
محمد العامر- الجوف
* هذولا شامين من زمان ولكن اوجعتهم الحقيقة وأولهم «بتاع العيديات» وما قدروا يقولون شيء..