أطهر بقاع الأرض تقصد بتدمير

المملكه بأفعالها يقتدي الغير
بأفضالها دايم لها الأسبقيّه
دستورها القرآن خير الدساتير
فيه السعاده والحياة الهنيه
فيها الحدود تقام حقٍّ وتطهير
حسب الأدِلَّه والشهود القويه
مركب بلدنا في بحور الرخاء يسير
ويرسي على شاطي المبادي النقيه
ولا يْوضِّحِ الواضح كثير التفاسير
في الطِّيب دولتنا لها الأولويه
ما همنا دخان من ينفخ الكير
ضد الفتن تبقى بلدنا عصيه
مكايد الأعدا على بلادنا تغير
دسايسٍ تنسج بليلٍ خفيّه
يا من تريد لصفونا دوم تعكير
مكايدك زادت بلدنا حميه
ما للزوابع عندنا أيِّ تأثير
عاشت بلدنا في حماها أبيه
ما صار في طيبه يفوق التصاوير
يدمي القلوب اللي بها احساس حيه
في مأرز الإيمان قتل ٍوتفجير
في ساعةٍ فيها الإجابة حريه
من باغيٍ جاوز جميع المحاذير
نفسه من الإسلام جرداء خليه
من هو الذي دسه ومن هو له يدير
ومن هو الذي غذاه بالطائفيه
محدن توقع كل ما صار بيصير
ما كنها إلا فبركة مسرحيه
أطهر بقاع الأرض تقصد بتدمير
وبيوت خالقنا وحجرة نبيه
يارب سترك من غواة التفاكير
خوارجٍ فيهم فساد الطويه
تقتل موحد دون جرمٍ وتبرير
وتترك دعاة الشر تنعم بفيه
اعقولهم كنْها مْحَقُونَه بتخدير
ونفوسهم مشحونهِ بْسوِّ نيه
يا مروعين الناس وش هي المعاذير
في قتل نفسٍ دون ذنب وخطيه
يفتي لكم فاسق وماجن وسكير
يملي لكم وأنتو لخبثه مطيه
بأفكار زنديقٍ غديتوا مصادير
مابه سليمٍ ينحر أمه وبَيَّه
من قال إن الدين بطشٍ وتكفير
شوهتوا الإسلام يا داعشيه
ما فيكم إيمانٍ ولو وزن قطمير
إن كان به بلوى فأنتوا البليه
ويا سامعين الذكر للنفس تعطير
صلوا على الهادي وزيدوا التحيه