من طاوع النفس الضعيفة تدهويه

إن كان رزقي في يد الخلق ما ابيه
خله يولي ما حسبنا حسابه
رزقي على اللي كل ابو الخلق ترجيه
الواحد اللي كلنا قدم بابه
منشي السحاب اللي تراكم علاويه
محصي دبيب النمل واللي حكا به
وانا احمد الله ما علي مشاريه
مادم طعت الرب واخشى عذابه
واللي عصى ربه وبانت مواريه
واصبح على الأجواد يكشر بنابه
ومادام شيطانه على الناس مغويه
شربه هماج لو تزاين شرابه
يصبر وعجلات الليالي توريه
ولابد ما تطوى الدقايق كتابه
مهما يتظاهر بينات خوافيه
وزاده قليل لو تكاثر زهابه
ومن طاوع النفس الضعيفة تدهويه
ومن لا وزن ممشاه هفت ركابه