بيت وصدى

الأسبوع الماضي كان بيت الأسبوع من طرح الشاعر عبدالعزيز الواصل من عنيزة والذي يقول:
المال مال الله ولازم تزكي
واترك طريق ابليس وابليس ملعون
وقد كان صدى البيت من الشعراء:
ركن من الإسلام ما فيه شكي
من يجحده كافر مثل كفر فرعون
لا يصير مالك في جهنم حطبكي
يكوى بها جنبك وظهرك والعيون
في اخراجها فرحة مساكين تشكي
دين وفقر والحال من دون في دون
محمد بن عبيد الديحاني
رياض الخبراء
اغنم زمانك وانتهض لا تتكي
وخل التهاون والزمن غير مضمون
يجيك يوم ما يفيد التشكي
ترى زكاة المال خير ولك عون
وبالآخرة ما من خلاص ومفكي
نار تلظى واحذروا لا تغفلون
محمد بن عبدالعزيز الخنيفر - أشيقر
صدق كلام الله ولا تشتشكي
الله فرضها اللي خلق ساير الكون
المال ما هو من المنايا يفكي
والله وعد بالويل من لا يزكون
اقرأ الكتاب وخل عينك تبكي
واقرأ السور وأسجد مع اللي يصلون
عقلا خزن العنزي - تبوك
ذا ثالث الاركان ما فيه شكي
أساس فالاسلام وانتم تعرفون
حتى لون عندك على المال صكي
واجب لها يأهل التجاير تزكون
ولا تحسب انك وسط مالك متكي
يوم يجون بك المعارف يعزون
محمد جلمود الشكره - الدلم
هذا كلام الصدق ما فيه شكي
المجتمع واهله ترى يستفيدون
الخير ما من دونه الباب صكي
والأقربون اليوم يمك يلدون
خل التشكي وش تبي بالتشكي
لازم تزكي مثل ناس يزكون
إبراهيم بن مسمار القحطاني - الرياض
اللي مازكا المال حاله يبكي
أقول تعذيبه بلا شك مضمون
الله فرضها فرض ما فيه شكي
أمراً من الخلاق والناس يدرون
زك البدن والمال ما فيه فكي
أحرص عليها يا فتى لو مديون
عوض عويض السلمي - الرياض
اللي بلغ ماله نصاب يزكي
ركن من الإسلام ياللي تعرفون
تمسح بها دمعة أضعوف أتبكي
في كل عام جالسين ايتحرون
ويطهر بها مالك وينمو ويزكى
تكافل ربي فرضها بها الكون
عبدالعزيز علي صالح السعيد - الرياض
مر الولي معروف ما فيه شكي
امر الولي كل البشر عنه يدرون
عطاك مال وقال لازم تزكي
ادفع زكاة المال والربح مضمون
بكرة إذا فلست إلى مين تشكي
اكيد تشكي لله مكون الكون
سلطان بن حمد أبو شقاف الحبابي - الطائف
ياللي على أكياس الدراهم متكي
ارفق بحال اللي من الفقر مطعون
ما دمت حي احسب حسابك وزكي
الدايم الله لو معك مال قارون
دنيا البخيل بخاتمتها تبكي
لو مدخر في البنك ميتين مليون
صالح سفر العمري
لا تنسدح منعم أو جالس امتكي
أو غيرك فقيرن حالته دون في دون
يا اللي على طول الشداد امتركي
غيرك ترى ناسن ما فالبيت ماعون
فرضة على أهل المال ما فيه شكي
وحده امن الاركان يا اللي اتحضون
نواف نايف هلال الحزيمي - الجمش
ايلي تولها الشخص معاد فكي
حتى يشوفه داخل الأرض مدفون
تلقاه دايم في طريقك متكي
ولو يوعدك بالفقر فالرزق مضمون
ويلحقك فعمالك وساوس وشكي
والنفس تبي جهاد ياللي تعرفون
غنام مسعود القريني - نعام
نعم صحيح الامر مافيه شكي
تصدقوا ياللي على النفس تقوون
جلعود بن لافي الشمري - حائل
اسمع كلام جاك من جاش تركي
عمرك لو انه طال ما هو بمضمون
حاول تزكي قبل بابه يصكي
آلاف تجلب لك من الأجر مليون
حكم جلي مافيه ريب وشكي
وعزي عن اللي بالرخى ما يزكون
تركي عيد الديحاني - المجمعة
فرج عن المسكين قدام يحكي
واحذر من الشيطان يرميك بالهون
اعط الفقير اللي من العسر يشكي
مما عطاك الله ظاهر ومكنون
طلع زكاتك واعط محتاج يبكي
قلبه غدى من عاتي الفقر محزون
علي جابر الزولاني الفيفي - فيفا
بيت الأسبوع
من طرح الزميل معد الزاوية عادي الشمري.. ويقول:
بعد الأعياد لا تنسون يا أهل الصيام
ست شوال كنك صمت كل الدهر
نستقبل صدى البيت بثلاثة أبيات فقط تدور حول موضوع صيام ستة من شوال وفضلها. على الفاكس (4871070) «خزامى الصحارى» زاوية بيت وصدى.
كما نرحب بطرح بيت الأسبوع على أن يناقش قضية اجتماعية هادفة.