بيت وصدى

الأسبوع الماضي كان بيت الأسبوع من طرح الشاعر ابراهيم مسمار القحطاني والبيت يقول:
ياللي تظاهر بدار مدلهين الغريب
تراك مخطي وجاحد للأمن والأمان
وكما عودتمونا أيها القراء الأعزاء من تفاعل مع ما نطرح في هذه الزاوية الهادفة كان الصدى لهذا البيت بأكثر من احدى وستين شاعراً ولضيق المساحة انتقينا لكم حسب الاجتهاد التالي:
لا تستمع للفقيه وما يقول المريب
جابان ما يستطيع الا بقول اللسان
ان كان لك حق يا مغرور واضح امصيب
اثبت وتأخذ احقوقك بالوفى والبيان
حنا بدار السعود مطوّعين الصعيب
ناكل ونرقد وهم ايصارعون الزمان
نافع الحربي - الرياض
يابن الوطن أنت دايم بالإشارة لبيب
الزعزعة لا تثيرك صم عنها الأذان
مظاهرة في بلاد العز شيء غريب
ماهي لجدك وأبوك ودارنا ما تهان
لا تستمع في سفيه عاش تحت الصليب
ملك ومال الجبان وما يقول الجبان
محمد بن عبيد الديحاني - رياض الخبراء
ما يجحد النعمة إلا كل قلب عطيب
وحنا فداء أرض عطتنا خيرها والحنان
واللي تظاهر عليه العيب وألفين عيب
هذا كلام الحقيقة من فصيح اللسان
وأقول حنا العرب ومعاهدين العريب
وحنا هل العهد الأول من قديم الزمان
مسفر بن ثابت آل غانم القحطاني
هذي سلوم غريبه والله امر عجيب
ترى الوطن له محبة بالقلوب ومكان
ولد الوطن ما خفى هو للمشاكل حريب
يا كيف ترضى تشوف الشر وين الحنان
هذا وطنا ولا غيره فصر له مجيب
هذا الوطن له كرامه من يخونه يهان
محمد بن عبدالعزيز الخنيفر - اشيقر
انكرت فضل الملوك مطوعين الحديب
في لحظة انسيت فضل املوكنا يا جبان
من خل بأمن الوطن بعيد ولا قريب
والله ما جامله لو انه عزيز الأخوان
انا سعودي بلاده عنده أغلا حبيب
اموت وحيا وداري مكرمة ما تهان
سلطان بن حمد الحبابي - الطائف
صح قولك يابن مسمار سب الحريب
يا عاد تعطيه فرصة في علو وطمان
عدو نفسه يجيب العيب ما جاب طيب
الشرع يعرف وغير الشرع ما له ضمان
جاحد الفضل ما هو في حياتي صحيب
لو تظاهر وجمهر من هوان بهوان
عبدالرحمن عبيد العازمي - الخبراء
واللي كذب عارفينه للسعد ما يجيب
كذبه نضح من كلامه والردا فيه بان
ردي ومن يسمعه مثله ردي النصيب
وعيب على اللي رضى بعد ارتفاعه طمان
وبالشعب ظن الفهد بإذن الولي ما يخيب
ولا عاد للي يخون الدار فيها مكان
فهد بن عقيل الطويان - بريدة
يابن مسمار قولك مثل طعم الحليب
الا من نعمة مطلوبة بكل زمان
وما يتظاهر سوى اللي له حق سليب
وفي بلدنا بتاخذ حقك ولا تهان
في ذرى قايد الأمة وعز القريب
المليك المفدى بالولي مستعان
حميد بن خلف الملفي العنزي
بيت الأسبوع
طرحه للنشر الشاعر ماجد بن عبدالله الماجد من الرياض ويقول:
جانا السماح اليوم في فسح جوال
واحذر تصور به محرم وبهتان
والبيت يناقش موضوع السماح ببيع جوال الكاميرا وما يترتب على ذلك من استخدامات
نستقبل صدى البيت بثلاثة ابيات فقط تدور حول موضوع البيت على فاكس 4871070 خزامى الصحاري - زاوية بيت وصدى.
كما نرحب بطرح بيت الأسبوع على أن يناقش قضية اجتماعية هادفة تهم المجتمع.