صوت الصورة

نيسان غرّز إلى جنطه
أولاد صاروا يدفونه
والكل شايل معه شنطه
يم المدارس يسوقونه
لو كان فيه الدبل حطه
والعلم غالي يريدونه
عبد العزيز الصالح - القصب
وقف عليهم ثم قاموا يدفون
وكلٍ على ظهره دروس محموله
صغار ورب البيت ما ضن يدرون
أخطار وسط الدرب ياهي مهوله
من يطلب العليا ترى العز مضمون
تجي شهادة علم .. حلمٍ تطوله
ياللي تسوق بهم حذاري يطيحون
واللي خطر لابد عنهم تزوله
عثمان إبراهيم الرشيد - الرياض
الله يعين اللي يدفون
الوقت روّح ولا يدرون
تكفون يا ناس تكفون
طلاّبنا لا يضيعون
يالله بشاصٍ على الهون
يطلّع الددسن المدفون
عبدالكريم عبدالرحمن السلّوم - القرائن
ياهل المعارف كيف بالوضع ترضون
للإبتدائي يقطع البر طلاب
ددسنهم مغرّز .. وشفهم يدفون
طريقهم تغريز وترادم تراب
يا ناس بأبناء البلد لا تضحون
براعم التعليم هي دايم أسباب
سعود عبدالعزيز الهزاع - نعام
أطفال يا عمري لموتر يِدِزُّون
من وارد النيسان في الرمل غرَّز
من أجلهم قلبي كسيرٍ ومحزون
كنِّ الضمير بْمِنْجل الزَّرع ينْجَز
لجل العلا درب الصعوبات يا طون
فيهم نفاخر .. ونْتباها .. ونِعتز
معهم حقايبهم إلى العلم يسعون
من نام في فراشه قضى العمر ما ارتز
ناصر جمعان آل عوض - وادي الدواسر
يالله تجنبنا دروب المهالك
وتلطف بنا يا والي العرش والدين
طلاّبنا اللي دربهم غير سالك
وتوقفوا بالدرب لا يسار.. ويمين
خالد ناصر المخيمر - روضة سدير
كانوا قديماً في المدارس يعانون
الشاهد الصوره على بيض الأوراق
صورة ونيت هاري وقف بهون
غرّز وركابه على وقت الاشراق
ويا حيلة الله يوم قاموا يدفون
ما فيه من يسعف ولا فيه اشفاق
لو هم صغار مالهم غير يمشون
امور صعبه تحرق القلب احراق
حمد عبدالله الوايلي - حوطة سدير
أكيد ما قدّرت يا رب جاري
لكن أحذر واتكل مع فطانه
في صورةٍ تغني عن أية إبانه
تعطّل الطلاّب في دوّ خالي
ولموتر الفرجات وصف ومواري
جدّه وقوّه مع دوام الصيانه
سعود عائش الحربي - جدة
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
ويا هلا..
صورة العدد السابق