قولوا لها

يا صاحبي ما يزيل الهم كثر السؤال
ارفق و خل الجروح الخافيه خافيه
هموم صاحبك من دنياه كبر الجبال
تثاقلت في ظهَره و جته متقافيه
أثقل من الدمعه اللي في عيون الرجال
و أقسى من اليتم عند العمة الجافية
الليل بي زمهرير لعاري المتن طال
و الصبح رمضاه تحرق رجلي الحافيه
لا قلت لي كيف حالك ما تشكّيت حال
حبست دمعي و قلت بخير و بعافية
لو كان ما اشكي لغير الله رب الجلال
ما يستر الحزن لون ثيابي الضافية
يا كم نهرت الجفا و اشعلت نار الوصال
للي غلاها يفوق الوزن و القافية
ما املّ منها لو الصحراء تمل الرمال
لو فاقدٍ .... و يدينها الدافيه
لو هي جفتني غلاها باقي ولا تزال
الوافية ، رغم كل اللي جرى وافية
قولوا لها .. لو تلمح لي بطاري ( تعال )
لاسبق حروف الهجاء لجروحها الشافية
قولوا لها لو نستني ماضيات الليال
لا تلحق الماضيات لياليَ اللافية
قولوا لها ما تبعنا كل قيلٍ و قال
لو عكّر الوقت تبقى قلوبنا صافية
عبدالجبار الجفيني