الحويفي عزف على الوتر الحساس فأهاج الشعراء

نشرنا في عدد الجمعة ما قبل الماضي مقطوعة رائعة للشاعر الكبير بدر بن عواد الحويفي يحض فيها على الاهتمام بالشعر لتمييز غثه من سمينه وبالذات ما تنشره اجهزة الاعلام.
ويتساءل عن المتسبب في تكاثر الغث وما افضل وسائل حل تلك المشكلة فجاءتنا ردود شعرية كثيرة,.
وكان الرد الاول من الشاعر حواس بن غازي الديري اذ يقول:
يا مهندس المعنى بعرف وصلابه
دكتور للمعنى اليا قال يوفيه
من عيلمن عدن عذين شرابه
عد الروى وطعم العذوبة محليه
حيه وحي أبياته ومرحبا به
حي الأديب وواجب انا نحييه
ترحيبة المخلص بلطف ورحابه
مني لابو سلمان حقن انبديه
عبر الجزيرة يوم نقرا خطابه
يرتاح من يقرا جوابه ويوحيه
ومثله يزيد الشعر عز ومهابه
بدر الحويفي شاعر نفتخر فيه
يازين نقد العارفة مع جوابه
هادف على المعنى ولا فيه تمويه
ووصفة طبيب القيل يلقى الشفابه
والراي مع رأيك سوى يوم تبديه
اللي ذكرته شايفينن خرابه
بعض المنابر شوه الشعر تشويه
وما دام له مثلك وشرواك لابه
ينعم بخير وعامر امتن ميانيه
بوجود رواده معزز جنابه
ومساندينه لو حصل ما يعانيه
حواس غازي الديري
القصيم قبه
***
القصيدة الثانية جاءت من الشاعر منصور المجيدل حيث قال:
يا حي من جتنا ابيوته كتابه
وسط التراث اللي نحبه ونغليه
يا مرحبا باللي سأل يا هلابه
اهلا هلابه عد نجم بعاليه
منك السؤال وهاك مني جوابه
شعر الاصالة قرب ايجف واديه
بعض القصيد ايصيبني بالكآبه
مثل الطلاسم صعب تفهم مغازيه
واليوم لا صار المحرر قرابه
تصبح سعيد الحظ شعرك يبديه
لو الكسر في كل الأبيات صابه
لو هو غثيث وضايعات معانيه
من كان شعره مثل قوس الربابه
شوري عليه انه ابجيبه يخليه
شعر بليا قاف صكيت بابه
وشعر بليا وزن ما نيب باغيه
وشعر بلا معنى هماج شرابه
ما فاد من قاله ولا فاد قاريه
الشعر شمس ما حجبها سحابه
نعرف نفرق بين عكره وصافيه
يا بدر ما زال الشعر له مهابه
ما دام به مثلك وشرواك يبنيه
منصور بن عبدالله المجيدل
الرس
***
القصيدة الثالثة جاءتنا من الشاعر عبدالله المحمود ابو جابر عضو مركز الأمير سلمان الاجتماعي بالرياض:
ياللي سألت وتنتظر للاجابه
عندك جوابك لكن انك مخفيه
أنت الفهيم اللي يفك النشابه
مثلك جوابه خازنه في محانيه
تنشد عن الشعر النقي وش غدا به
وش كدره من عقب صفوة معانيه
شعر تخبره مكتمل في نصابه
هذاك يوم ان المراجل تغذيه
يوم المروَّه والكرم والنجابه
يوم الشهامة والشجاعة تنميه
هذاك مثل الماء عذي شرابه
أصبح قليل وغايرات مجاريه
واليوم شعر الناس كثر الردى به
نظمه هزيل وخايرات قوافيه
مثل الرجل تعجبك نظرة ثيابه
والى مشى تأخذك ركزة علابيه
والى حكى حكيه يقلل مهابه
يا زين صمته تندم انك محاكيه
شعر يدون يا خسارة كتابه
يا بعد عن حلو المعاني خطاويه
مطبوعه حروفه بحسن ورتابه
مثل الجسد لا فارق الروح تشبيه
يكتب بصفحات الجرايد انشابه
سدة فراغ وضيقه لصدر قاريه
ما فيه امر يستحق الغرابه
لا تنتظر من فاقد الشي يعطيه
عبدالله المحمود
عضو مركز الامير سلمان الاجتماعي
***
القصيدة الرابعة كتبها الشاعر المعروف سرور سفاح المطيري:
يا كاتب اكتب وانتبه للكتابه
اسمع كلامي واكتبه مثل ما امليه
وعن الخطا خلك مع الكتب نابه
ترى خطا الاملا لمعناه تشويه
الاوله بدر الحويفي هلا به
الشاعر اللي طاب علمه وطاريه
ومن عقبها يا بدر جابه بجابه
وجهة نظر,, والراي مطلبك وابديه
هذا طبيعي يا بدر,, لا غرابه
لو شفت في حال الشعر ما ينافيه
الشعر سوق باع به واشترى به
ناس كثير ومن بغى السوق ياتيه
ميدان كل فيه نوخ ركابه
هذا يصبح به وهذاك يمسيه
وبعض الذي على المنابر عيابه
الشعر مبلي جعل ربي يعافيه
وان كان تبغى الشعر يحسب حسابه
طالب معي بايجاد هيئات تحميه
نبغى يشكل له لجان ونقابه
جهات مسؤولة عن الشعر واهليه
عل وعسى بعض الاوادم تهابه
ويبقى عزيز لمن يحبه ويعنيه
سرور سفاح المطيري
المذنب
***
القصيدة الخامسة كتبها الشاعر نافع مفرح البشري من الرياض حيث يقول:
دكتور معنى الشعر ألقى خطابه
يطرح سؤال ينتظرنا نلبيه
بدر الحويفي هل وامطر سحابه
يسلم ابو سلمان والله يعافيه
له في قلوب الخلق حب ومهابه
اللي يعرفه واكثر اللي سمع فيه
شاعر كبير وكل حي اهتدى به
وطموح شعره ما تقرب مشاحيه
يبي تلاميذه تدارس كتابه
وتحاول تصونه من اللي عثوا فيه
وتوقف اللي ناهبينه نهابه
وتاضع لهم حد قبل لا تواريه
وأنا أرى تشكيل لجنة ذيابه
شعار كبار تحرسه وتحميه
تفرز رسائل مهتوين انسيابه
ولكل منهم رقم يعرف براعيه
بعد اجتيازه امتحان النجابه
يصير عضو ناجح بشيء هاويه
يسلم قصيده من هروج الصيابه
سالم معافى من جميع المشاريه
وهذا اقتراح عل ياخذ نصابه
من طالب يوجه ويحتاج توجيه
نافع مفرح البشري
***
القصيدة السادسة كتبها الشاعر صالح علي الحربي فقال:
البدر نوره لا سطع يقتدى به
وبدر الحويفي شاعر يقتدى فيه
سأل سؤال وصادق في جوابه
حول الأدب ومراقبيه ومعانيه
بابيات نشرت له جزيلة اعذابه
يطلب قصيد لا نشر فاد قاريه
ورجل الصحافة الامل والرجاء به
يختار زين الشعر والشين يلغيه
وشعر الحداثة والقديم يتشابه
لا جاد جايز من حديثه وماضيه
الشعر سيف من مسك في نصابه
شاعر ومن لا يعرف الصقر يشويه
اما الذي كنه اعليمي ربابة
صوت الربابة غير صوت يغنيه
يحتاج توجيهه بلطف وحبابة
اما يجيد الشعر والا يخليه
ومن كان معجب في خطاه وصوابه
هو حر في شعره صوابه ومخطيه
الشعر ما دون البشر صك بابه
لاشك يترك فاشله عند راعيه
ولو كان بعض الشعر ما فيه ثابه
اخير من شعر على الشعر تشويه
وجهة نظر كتبتها بالنيابة
عن الذي قصده يوفر قوافيه
صالح علي الحربي
ساق الجواء
المحرر:
شكرا للجميع على تجاوبهم ونعدهم جميعا ان تكون الجزيرة بقسمها الشعبي كما عهدوها المنبر الذي يجدون من خلاله اجمل الشعر,, واهم القضايا في ساحة الادب الشعبي والى موضوع آخر يطرحه عشاق الأدب الشعبي في وطننا الغالي وللجميع منا كل التقدير.