دولة بطولة

والمناسك قضيت بيسر وسهوله
وانتهى الموسم على غاية مرامي
دون منه وابتزاز ولا عموله
رغم ضيق الوقت وافواج الزحامي
ورغم حشد الناس بأعداد مهوله
بالمشاعر أمن وأمان ونظامي
موسم ناجح وتشهد له عدوله
والفضل لله وهو رب الأنامي
ثم يعود الفضل لك يا اعز دوله
دولة تسحب على هام الغمامي
مجدها اللي غيرها ما احد يطوله
تسخِّر امكاناتها في كل عامي
لجل وقت الحج يقضي حسب اصوله
تخدم الحجاج بالبيت الحرامي
وتخدم الزوار في مسجد رسوله
وتخدم الاسلام في غرب وشامي
دولة التوحيد ما هيب مخذوله
تنبري دايم لصعبات المهامي
وفي سبيل الخير اياديها عجوله
يشهد الله انها دولة ونامي
ويشهد الله انها دولة بطوله
ولو رماها الحاقد بسهم الكلامي
تسفه الحاقد ولا تخضع لقوله
طبعها ما تلحق الساقط ملامي
وطبعها ما تسمع ابواق عذوله
نهجها ان النور جلاي الظلامي
وللردى جولة وللحق ألف جوله
دامها بقيادة رجال حشامي
بدرها ساطع ولا نخشى أفوله
دام قايدها الامام ابن الامامي
أبو متعب فالأمل سهل حصوله
بطيب ابو متعب اغني بانسجامي
واعزف الحان الوفا واقرع طبوله
المليك العادل الشهم الهمامي
مكرماته فاقت الغيث بهطوله
بالكرم غطى على افعال الكرامي
والسياسة له بها جولة وصوله
تحت ظله كل شعبه ما يضامي
وكل شعبه بالغلا ملتف حوله
ان وقف له وقف شعبه باحترامي
وان تكلم كل شعبه صفقوا له
يا كبر حظه بدعوات الأنامي
يوم خيره عم في شعبه دعوا له
بنفس افدي سيدي عال المقامي
وافتديه بمال وعيال وحموله
وابو خالد نذكره دوم الدوامي
بسمته تشفي وخيراته شموله
هو ولي العهد وأفعاله عظامي
بان فعله في مواقيف الرجوله
ونايف اولى أمننا كل اهتمامي
هاجسه أمن البلد عرضه وطوله
خطته بالحج سارت بانتظامي
والحجيج بخطة الحج شهدوا له
وشبله محمد مهماته جسامي
مرتوي بالمجد من عهد الطفوله
حارب الإرهاب في حد الحسامي
ودق خشم إرهابي شانت فعوله
منه الإرهابي يقرط بالبهامي
ثم يلعن من بفعله طبطبوا له
وبا النهاية والصلاة ازكى ختامي
للشفيع مبلغ الهدي بنزوله
عطا الله بن سليمان العطا الله /الزلفي