قصيدة ألقيت بهذه المناسبة ألقاها الشاعر رشيد بن محمد الفريدي قال من خلالها

بمناسبة تكريم الضباط المتقاعدين بوزارة الداخلية
ابتديت بذكر من ظلل نبيه بالغمامه
العظيم اللي خلق سبع السموات العظيمه
سبحت له كل خلقه وانحنت له كل هامه
يطلبه منهو سجد لرضاه يخشى من جحيمه
فزت حروف القصايد وابتدأ الشاعر سلامه
وانتقى جزل المعاني والمشاعر من صميمه
المديح انتم مقره والقصيد انتم وسامه
الفرح والعود الأزرق في سماكم صار غيمه
كل حفل وله ضيوف وكل ضيف وله مقامه
ولا انتم مجرد ضيوف ولا هي مجرد وليمه
يا هلا يا مرحبا يا ذروة المجد وسنامه
ياسلايل من تعزوى واعتلى لشداد ريمه
حاكم قاد السرايا والجهاد أشهر حسامه
لين شامت له بحد السيف واذعن له غريمه
روض سباع الرجال اللي يفكون الجهامه
وامتلكهم في وفاه وفي سجاياه الكريمه
لو حكى التاريخ عن حرب الشنانه والرغامه
انذهل من غزوتين.. ونجد ماكانت عقيمه
ما توانا بالمسير ولا تهنى في منامه
لين حكمه عم دوله يا عسى ربي يديمه
اشهد ان عبدالعزيز الصيرمي حقق مرامه
وحد أطراف الوطن بالسيف وارياه الحكيمه
في ظلال الأمن ننعم من طريف إلى تهامه
والأمن ينعم بنايف زاده الله من نعيمه
نايف للي لا ذكرته شاش راسي بالعمامه
يتصف باسمى الصفات ويمتلك قوة شكيمه
القياده به طبيعة والأمن يملك زمامه
فيه حزم وفيه عزم وفيه طيب وفيه شيمه
وراعي الاجرام يا أحمد ما يشيلنه عظامه
عندك علومه تضيع ويرتعد لو هو صتيمه
هيبتك فيها تواضع فيك رحمة وابتسامه
تنصر المظلوم يا احمد وانت ما ترضى الظليمه
ويا سمي الهاشمي.. يا ذخر نايف يا خزامه
يا عضيده بالمواقف والمهمات الجسيمه
أنتم سيوف الشريعة والعدل والاستقامة
وانتم اصحاب المبادي والدروب المستقيمه
النفوس العابثة بأمن الوطن تلقى الندامة
في حماكم يا من الخايف ويكبح للجريمه
ما تخفي راسها وقت الخطر غير النعامه
ولا تقاد بدون فكر لحتفها غير البهيمه
الشريعة هي أساس الحكم هي مصدر نظامه
ما حسبنا للخوارج والشياطين الرجيمه
ما على الجاهل سبيل ولا على الحاسد ملامه
والحقيقة واضحة والنور ما تخفيفه غيمه
الزعامه للزعيم اللي سكن قصر اليمامه
خادم البيتين روح الشعب وحماه وزعيمه
أبو متعب طال عمره باذل كل اهتمامه
للمواطن والوطن في دولته معنى وقيمه
الرخاء بنيت قصوره والامن رفرف حمامه
وامتزج فيها التطور بالتقاليد القديمه
ودام أبوخالد ولي العهد جيشه باستلامه
المعادي يا طويل العمر يبشر بالهزيمه
الولاء ياسيدي يبقى بنا طبع وعلامه
وعاده فينا مدى الأيام تبقى مستديمه
والرجل اللي تكرم يستحقون الكرامه
افنو الأعمار لاجل الدار في صبر وعزيمه
الرجال أهل المواقف والوفا واهل الشهامه
الجنود المخلصين اللي نواياهم سليمه
يوم بعض الناس بالمطلاع حده للثمامه
ياصلون اقصى الحدود ويسكنون بجوف خيمه
البواسل يعشقون الموت لا ثور عسامه
ما يهابون المعارك لو عواقبها وخيمه
باسمك أهديهم تحيه.. لا رحم جد الرخامه
يا ولد عبدالعزيز اللي كسر شوكة خصيمه
والعذر يجبر خطا الشاعر ليا أخطا في كلامه
والفرح في شوفكم ذعذع على راسي نسيمه