زمانٍ ضدني

الزمان يدور دورة محاحيل الرشى
كل عام يبتدي بين برد وبين صيف
والهموم اللي تكانف تدوي بالحشى
كنها رعاد الامزان في عرض القنيف
كلما دقت ضميري هواجيس العشى
تسري أقدامي وكني على دربي كفيف
يا وجودي وجد من لا يعيّن له عشى
فالليال المعسره شاف ضيفه مستضيف
ان تعذر فالمواجيب عذره ما مشى
وان بدا في واجبه شاف ما جوبه كليف
من زمان ضدني عقب ما همه غشى
والزمان أقوى من الظلم للعرض الشريف
ما شعاني بارق المزن يوم انه نشى
ويتهيض به وليف تذكر له وليف
لادنى صبر المعنى وجرحه ما التشى
ما يفيد الغمد لا صار ما فالغمد سيف
والله ان الرابح اللي من الرب يخشى
والحياه تصارع الناس وابن آدم ضعيف
سالم دخيل الحبابي