والدي الغالي

أحمد الله واشكره واطلب رضاه
خالق السبع الشداد بلا عمد
كل شي صايرٍ بأمره قضاه
خاب من يجزع ويبشر من جلد
يوم عافى والدي مما ابتلاه
قلبه الأبيض بياضٍ كالبرد
لا تحسبون الألم واللي لقاه
من كبر عمرٍ ولا هو من جهد
لن قلبه شايلٍ عالم معاه
ما بقى به شبر ما حطه لاحد
القرايب والحبايب بالحياه
حزنهم وأفراحهم معهم بعد
كل أبوها أثقلت قلبٍ حواه
والله العالم بعد يمكن حسد
فزّ قلبي من خبر خالد طراه
أن أبونا في العناية قد رقد
جيت واخواني معي كلٍ مناه
دعوةٍ تلقى جوابٍ ما ترد
إن هالغالي يعافيه الإله
صحته ترجع كما كان الأسد
سالمٍ تسلم سلامٍ منتهاه
عدّ قطرات المطر وأكثر عدد
أدعي الله ما يخيّب من دعاه
يحفظ أمي مع أبي عمرٍ مدد
لأنكم نورٍ لنا نمشي بسناه
طيبكم وأنتم ترى روح وجسد
شكرنا لله العظيم اللي بعلاه
ثم نشكر كل من جانا ونشد
واشكر اللي خصنا بطيّب عطاه
راعي الفزعات حلاّل العقد
ما يرد اللي طلب عون ونخاه
بالشدايد هو سند نعم السند
أطلب الله يحفظك دوم بحماه
والأجور مضاعفة يا بو فهد