منهج الطيب

لا صار لك في منهج المعرفة دور
كلن على رايه يحدد مقامه
من لا يشاور لا تبدي له الشور
راعى الوفى يعرف حراوي كلامه
لا تبتدي بالهرج لاصرت مكبور
والمحترم يفرض عليك احترامه
واطلع مطاليع النشامى على الكور
وحذراك لا تصبح رديف المسامه
منتب عن الماجوب والطيب معذور
لا صرت جيز اهل الوفى والشهامه
القرم له في منهج الطيب دستور
ولا ضعيف الحيل يبقى هلامه
من يوفي رجال الوفى مابه قصوور
ولا يرتفع راس الردي بالعمامه
ولا صرت بعيون الحقيرين محقور
بعدك عن اللي ما ينومس كرامه
ومن كان لك في ماضي الوقت مذخور
لاصرت له ذخر عدتك الملامه
وربعك حزامك لا غدي وقتك دهور
لا من تنجد كل رجل حزامه
والمرجله والدين نور على نور
يجلا من الليل البهيمي ظلامه
جنحان حر لا عتلى عقب صقور
والحر ما ينزل لعش الحماه
والطير لو احدى الجناحين مكسور
ما ينهضه ريشه وباقي عظامه
والادمي فالوقت منهي ومامور
يفنى ولا ياصل لغايت مرامه
وما قدم المخلوق فاللوح منشور
واللي مضى ما غاب يوم القيامه