ليل السهر

يا وجد يا وجدي على راحة البال
لا واهنيك يا القلوب المريحه
وأنا سنين وحالتي مثل هالحال
ما غير صدري مستمرٍ فحيحه
ينقال شيء وشيء ماهوب ينقال
ومن طاح ماحدٍ ناشدٍ عن مطيحه
يا وجد وإنتي بنت وافين الأفعال
ماهو كلام مدورين المليحه
قول وفعل يضرب بهم شيخ الأمثال
ودليلها معها علومٍ صحيحه
لا والله إلا طال ليل السهر طال
أعوذ بالله يا الوجيه القبيحه
بعض العلوم أسرارها عقل وهبال
لو قلتها ما عاد تبقى فضيحه
كوارثٍ تصفق من الجال للجال
منها سليمات النوايا جريحه
من عاشها يبقى مع الهم رحال
يبطي وهو ما شاف للخير ليحه
والعلم عند اللي ليا قال فعال
وليا ومر شي يزيحه يزيحه
سبحانه اللي محصي كل الأعمال
ما لفظ من لفظٍ حفظ في صفيحه
أنصاه وأنا أجيه في كل الأحوال
لو كان حسنات المناجي شحيحه
ما يقنط المسلم لو أن الشقاء طال
كنه يشوف اليوم الأفراج ضيحه
يا وجد وإلا جرح الأعماق لازال
من واقعٍ ما كل واقع يبيحه
من دون حله كل خوف الزمن حال
ماله سوى الصمت الطويل وفحيحه