جعله مع الأبرار وأهل الشفاعة

رثائية كتبها الشيخ الأدهم بن هجاج الوسوس بفقيد القبيلة أخيه الشيخ جازي بن هجاج - طيب الله ثراه - وأسكنة فسيح جناته وأنزله منزل صدق عند مليك مقتدر:
مرحوم يا قبر برأس الرفاعه
عسا السحاب برحمة الله يسقيه
يمطر عليه ويرتوي كل قاعه
يسقي الوطن ودياره اللي حواليه
ياوي قبر حط وسطه بضاعه
بضاعة اللي ضايماته لياليه
يبذل له المجهود بالاستطاعه
اللي بفعل الخير دايم مساعيه
مقدم هل المعروف وأهل الشجاعه
ربعٍ لهم شرهه وتدى المشاريه
بيض عليهم يوم وقت المجاعة
وعلم الشجاعة جاك ذكره وطاريه
لو أتمنع ما قدرت المناعة
مجاور له مجلس كان بانيه
المجلس اللي مدهلٍ للجماعه
دايم طحاطيح القبايل تجي فيه
الطيبين أخوان عرف ووقاعه
ياجب علينا كل طيب نعزيه
الله من قلب قوي اندفاعه
يرجف بصدري بس وشلون أهديه
إليا هدى لحظه صفقني بساعه
كن الضلوع اللي تضبه تعاديه
على وداع اللي صعيبٍ وداعه
وداع من سافر ولا نيب براجيه
وداعة اللي معتنٍ بالوداعه
مايخيب عبد خالقه معتنٍ فيه
جعله مع الأبرار واهل الشفاعة
يقرأ كتابه في يمينه منجيه
والله يرزقنا يقين وقناعه
ما أحدٍ مسوي شي ما الله مسويه
شعر الشيخ