مرحوم يا جازي.. حميد السجايا

في رثاء الشيخ جازي بن هجاج الوسوس الفريدي رحمه الله
يا قلب ياللي تصتلي بالكوايا
صبرك على ما فيك عند الصواديف
الصبر محمود العواقب جزايا
يجزا به الخالق وسيع المحاريف
صبرك على اللي جاه سيف المنايا
بقفايتا ربعه والاجانيب والضيف
هيف السمين للي غذوها الشوايا
كريم سبلا ما حسب لتكاليف
في جنب بيته مثل ذبح الضحايا
وصينيته طول الدهر للمضاييف
والبيت في طلحه كبير النحايا
ينصاه هتاش الخلا بالمشاريف
فيه الدلال المكرمات الركايا
بالهيل والبن اليماني لها كيف
مدهال شمطان اللحى والدهايا
ينصاه شيخان القبايل تقل سيف
وان عدت الهقوات واهل الهقايا
ميقاف أبو نواف ميقاف تشريف
طلحه زهاها الشيخ وسط القرايا
واخذ لها من ضمن الاوطان تصنيف
يالله يا علام سر الخفايا
تجعل لابو نواف بيض الاصاحيف
بحسناك يالخالق تزيل الخطايا
عطفك ولطفك يوم فتح المظاريف
وتجبر عزا قلوبا تهز الحنايا
في غصت العبرة وفرقا المواليف
وجعل المزون الصادقه بالنوايا
اللي من الغربي تزاحم مراديف
تستقي ضريخ الشيح عدة سقايا
تأخذ على قبره لها ايام ما تقيف
وعسى البقاء في روسكم يالنقايا
نواف مع نايف وهجاج ومنيف
وباقي الحرار مكملين المزايا
تمشي على دروب الرجال العواريف