نوايع بساتينه

بصمة

عفا الله عن قلب شكا والسبب عينه
شكا واشتكى والناس ما ترحم المصيوب
تراك السبب يا عيني اللي تورينه
تورين قلبي وأحرقه حامي اللاهوب
الا يا وجودي وجد من غرقه دينه
عليه الديون العام ثلثينها مقلوب
على جاهل يمشي دلع شايف زينه
يفوق البنات وسنها غاية المطلوب
صغير غرير الحب يجهل قوانينه
قصاني على حدي وأنا ما علي ذنوب
غزال غزاني جعلها في موازينه
رماني وأنا عابر سبيلي مع الشلهوب
أنا كل ما طالع نوايع بساتينه
وإلى كل دانة بالبحر دونها شاذوب
أجاوب حمام معجبن من تلاحينه
يجر اللحون ويفجع الخاطر المتعوب
الا واعذابي جرحتني سكاكينه
ولا ينشكي فعله على الشرع والمنصوب
عسى الله يقود الولف بيني ومابينه
اطفي ضمير فيه فرن الهوى مشبوب
الا يا ظريف الطول وين العهد وينه
علي الشقا من يوم عرفي معك مكتوب