يا هازم الأحزاب

ياالله ياللي ما خسر من ترجاك
ياللي قدرك يصير ما فيه تشكيك
ياخالق خلقه من امشاج بدراك
ياللي جميع الكون في قبضة يديك
ياعالم بالغيب ما شيء يخفاك
أنت الكريم ولاتعدد حسانيك
يالواحد المعبود يامجري الأفلاك
اللي لياضاقت علينا نناجيك
ما خاب عبد في دجا الليل ناجاك
يرفع أيدينه للسماء طمعةٍ فيك
يافزعة المحتاج لالاذ بحماك
تنجيه من غبات سود التهاليك
ياللي هزمت ببدر طابور الإشراك
وبحنين فككت الضلالات تفكيك
ياهازم الأحزاب رحماك رحماك
عبدك ذليل ومقبل لك يناديك
تقبل قيام وصوم عبد تنصاك
ماله مجيب إلا أنت وأقبل يناجيك
عفوك وغفرانك ورحمتك ورضاك
يامفرج الكربه وعقد الشرابيك
عبدك سجد لك خاشع يطلب عفاك
وفي كل لحظة يبتهلك ويرجيك
اليا ذكر يوم خطاطيفه أسلاك
سالت دموعه فوق خده دواليك
أغفر ذنوب اللي تهوله لضاياك
بيوم عبوس الناس فزعا مرابيك
أنت الرحيم اللي جزيلة عطاياك
اللي ليا ضاقت علينا نناجيك