ماخاب عبدٍ في دجا الليل ناجاك

يالله ياللي ماخسر من ترجاك
ياللي قدرك يصير مافيه تشكيك
يا خالقٍ خلقه من امشاج بدراك
ياللي جميع الكون في قبضة يديك
يا عالم بالغيب ماشي يخفاك
انت الكريم ولاتعدد حسانيك
يالواحد المعبود يامجري الأفلاك
يا مقسم الأرزاق عون المظانيك
ما خاب عبدٍ في دجا الليل ناجاك
يرفع ايدينه للسما طمعةٍ فيك
يا فزعة المحتاج لا لاذ بحماك
تنجيه من غبات سود التهاليك
ياللي هزمت ب بدر طابور الاشراك
وبحنين فككت الضلالات تفكيك
يا هازم الأحزاب رحماك .. رحماك
عبدك ذليل ومقبل لك يناديك
تقبل قيام وصوم عبدٍ تنصاك
ماله مجيب الا انت وأقبل يناجيك
عفوك وغفرانك ورحمتك ورضاك
يا مفرج الكربة وعقد الشرابيك
عبدك سجد لك خاشعٍ يطلب عفاك
وفي كل لحظة يبتهلك ويرجيك
اليا ذكر يومٍ خطا طيفه أسلاك
سالت دموعه فوق خده دواليك
اغفر ذنوب اللي تهوله لضاياك
بيومٍ عبوس الناس فزعا مرابيك
انت الرحيم اللي جزيلة عطاياك
اللي ليا ضاقت علينا نناجيك
موسم بن سفر القثامي