هم أساس الدولة

هاض فكري عندما هاضني معنى القصيد
وصار عندي ردة الفعل يسوى ردها
واحتفل واسع خيالي بمعناه الجديد
وجاب جزلات المعاني سمان وعدها
بأول الافراح ومناسبة يوم سعيد
الروابع بيحت كل ما في سدها
فرحة بانت بوجه القريب مع البعيد
واجمعت بين القلوب وتبين ودها
والدليل أن المحبة بداخلنا تزيد
في قلوب الشعب ما عاد يعرف حدها
أنت يومك يا وطن يوم تاريخه مجيد
فيه تزخر مملكتنا ويشذى ندها
فيك تلبس مملكتنا لها ثوب جديد
نظرة العاشق بحسن الجمال تشدها
الهنوف اللي كساها الحلا مع طول جيد
تسحر الناظر ليا شاف باهي خدها
وإن نواها الخاطب تقول صعب اللي تريد
ما يكون بهاجسه يقترب من حدها
يوم فرحتها علينا بذكراها يعيد
ذكريات الماضي اللي تبين جدها
يوم وحدها راع المجد والباس الشديد
ما توانى دونها والمصاعب صدها
أبو تركي وحّده صامل الراس العنيد
اعتزى بالعزوة اللي مقامه قدها
الامام القايد اللي له العليا رصيد
نصرته للحق ما احد وقف له ضدها
يا عسى في جنة الخلد منزاله أكيد
من بنا صرح العدالة لنا ما هدها
عقب أحرار لهم بالوفاء كل يشيد
الحرار اللي هددها فخر من هدها
هم أساس الدولة اللي بها الخير العديد
نهجها الإسلام والأمن صافح يدها
تحت راية صقرنا راعي الراي السديد
استمدت الإسلام والأمن والله اللي مدها
خادم البيتين ليث وابو خالد عضيد
هم خلال في عيون العدو وأن لدها
والنهاية قبل لا ينتهي مبدأ القصيد
التحية للمليك ووطنا أردها