ملوكنا مزبان من صكه الجال

لو العمر يشرى وينباع بالمال
سقنا العمار وكل ثروة كثيره
ويبقى الفهد درع لنا دوم وظلال
القايد اللي عم الأقطار خيره
مكة وطيبة يشهدن له بالاعمال
والطرق والتعليم في كل ديره
لا شك ما نقدر على الموت نحتال
ان جا القدر عنده تضيع البصيره
الموت قاهر للصناديد يغتال
ومن حل يومه ما قدرنا نجيره
غاب الفهد رجل الوفا طيب الفال
رمز الملوك اللي نقي السريره
من موتته كن الوطن جاه زلزال
وصارت علينا مثل يوم الحشيره
والشعب حزن وازرق الدمع ينهال
لاجل الفهد تذرف دموع غزيره
لعل له في جنة الخلد منزال
وينجيه ربي من لهايب سعيره
ويسلم لنا الزيزوم حمال الاثقال
غيث الوطن ضد الوجيه الشريره
عبدالله اللي بالوفا ما له امثال
يمناه في لطم الاعادي شطيره
هو الخلف ومبايعه ثم فالحال
وتمت له البيعة بفكر وبصيره
وزال الحزن واستبشرت كل الاجيال
بمستقبل نفسه لفعله جديره
عبدالله اللي للصعيبات شيال
ليثٍ أسد يخيف الأعداء زئره
وولي عهده للصعيبات حمال
سلطان عضده في اللوازم نصيره
سلطان عون اللي عليه الدهر مال
كبار القضايا في عيونه صغيره
ملوكنا مزبان من صكه الجال
انصار من صارت عليهم كسيره
بعد الله نعلق بهم كل الامال
يوفقهم الله يكملون المسيره
ريف الضعيّف واليتامى والاطفال
واللي معاق وكل عود وضريره
هذا صحيح اللي مثبت بالافعال
ما مثلهم بين الملا في البريره
كل اسرة آل سعود الأول مع التال
ذرا لنا عن حر صيف وهجيره
ان غاب بدرٍ هل من بعده هلال
عينه على كل الرعيه سهيره
والله ما نسمع لحاقد وعذال
سفيه عقل ما يحكم ضميره
ركبه إبليس وصار لبليس مرسال
وعناصر الإرهاب صارت تديره
وصلاة ربي عد ما هل همال
على النبي عدة حقوق المطيره