كل الجهات

يا ليلة البارح أنا منك ما طبت
يا صعب لحظاتك وياهي عنيده
منها يشيب الرأس لو كان ما شبت
وفيها ذكرت اللي مضى وقمت أعيده
للعين دمعات القهر وللصدر كبت
وللخافق المذبوح حكي وقصيده
وللعمر أهداف وأنا ما بعد صبت
أنا أشهد إن أهداف عمري عديده
أدري بأن الأربعاء يتبعه سبت
وأدري بعد ماهي على الله بعيده
لاشك أنا للأولويات رتبت
كل شيء يأتي عقب ذيك (الوحيده)
اللي غلاها انزرع زرعت النبت
وأسقيتها بدم الخفوق ووريده
بنت لك الله في هواها تعذبت
ومعها تذوقت الحياة السعيده
بوجودها ما أذكر للأيام حسبت
وبدونها عشت الدهور الشديده
كم عذلوني في هواها وجنبت
ربي رفعها عن القلوب البليده
هذيك لو تابت عن الحب ما تبت
هذيك بس اللي لها العقل سيده
هذيك لو تنطق باسمي لها ذبت
منها يجيك الحكي كنه نشيده
يا كثر ما شرقت فيها وغربت
وكل الجهات بدربها لي مفيده
(وحيدتي) لو غيبوها وأنا غبت
تطري علي وأقوم اكتب قصيده