شيعوه الجموع

هذه القصيدة في رثاء الفقيد دعيرم بن جربوع بن سحلي الشيباني . . غفر الله له ولجميع أموات المسلمين
مرحوم يا من مات يوم الربوعي
عسى له بجنات الأبرار منزال
عسى يجي قبره رياض وزروعي
أمين يا منزل تبارك والانفال
رحيل أبو فالح علينا يروعي
كن يتفجر داخل القلب زلزال
ساعة سمعت العلم هلت دموعي
والهم في قلبي غدى يشعل اشعال
قلبي تمزع بين حدب الضلوعي
يوم الخبر جاني عبر خط الإرسال
ابكيه ويبكونه جميع الربوعي
أنا أشهد أنه مات يا ناس رجال
من زود حبه شيعوه الجموعي
له في قلوب الناس تقدير وإجلال
قضى حياته في سجود وركوعي
ما هو من اللي يعشق القيل والقال
عن هرجة المغتاب صك السموعي
ولا قال قال فلان وفلان وش قال
ولا هوب في وصل الأقارب قطوعي
يسعى بفعل الطيب رجلي وخيال
رحل عن الدنيا رحيل القنوعي
ما غرته دنياه بقفاي واقبال
ولا هو على الدنيا حريصٍ طموعي
الآخرة همه على كل منوال
سافر سفر ما عاد بعده رجوعي
إلا نهارٍ فيه ميزان الأعمال
لعل قبرٍ ضم زين الطبوعي
يسقيه من وبل المخاييل همال
تأخذ مخاييله تهامل اسبوعي
لا عزل خيالٍ نشأ بعده خيال
عسى رسول الله يجيله شفوعي
في موقفٍ هوله يشيّب بالأطفال
ادعوا لمن هو مات يوم الربوعي
عسى له بجنات الأبرار منزال