مجهول المصير

روحي لا بد الحي يلقى الحي وتفيض العيون
في موقف مالي ولالك عنه درب ولا مطير
في وقتها ما للعتب قيمه يكون أو لا يكون
راع الخطا فينا يبي يشعر بتأنيب الضمير
واخذي حسابك للسؤال بأي شكل وأي لون
ما دامنا حيين لا تستبعدين انه يصير
عليك كيف يهون شي ما توقعته يهون
وانا به أغنى من مشى طيّب ومن دونه فقير
يا وجد حالي وجد من راحت سنينه فالسجون
اللي جنى غيره وهو مسجون للأمر الأخير
في دولةٍ دستورها القانون والراشي زبون
واخفوا دليله للبراه من الموظف للوزير
يمره النهار مثل الليل والا دون دون
سجن انفرادي لا جليس ولا ونيس ولا منير
مهموم ما فكر دقيقه لا بمال ولا بنون
يسمع بمجهول المصير وعاش (مجهول المصير)
ما جننوه الا تعدى مرحلة حد الجنون
واخلوا سبيله بعدما شافوه في وضع خطير
عليك وجدي كبر وجده كان لك قلبٍ حنون
لا تحرقين آمال قلبي والامل بالله كبير
والياس لا يدخل عليك ولا تغيّرك الظنون
مدي لي الكف المخضب والمعطر بالعبير
مدي لي الكف الشريف يمون والا ما يمون
وامد لك كفٍ من العفه عن الطفه قصير
اروي عيوني شوف من جفنٍ سرق نوم الجفون
هذا وانا ما شفت منه إلا القليل من الكثير
لقبالك ألبس ثوب عيد أبيض ولقفايك كفون
ومن دون وصلك ما يذيّرني صفير ولا هدير
ابا انتظر متى يلوح البرق من غر المزون
والا يقال: ابشر واقول: اسفر مبشر يالبشير
وانهي معاناة الفراق المر واجر اللحون
واقول يبقى البعد شر اهل الهوى والقرب خير