نجدد البيعة

يا بو فهد لامن دنت حزة الجد
حنا عيال الطيبين القرومي
نجدد البيعه ونمشي على العهد
وفي حزة الفزعه سند اللزومي
وحنا جنود الله تحت راية الفهد
شعبٍ بحيل الله قوي العزومي
شعب على سنة نبيه محمد
وبكلمة التوحيد عزه يدومي
ما فيه دستورٍ علينا مورد
ولافيه قانون العباد الظلومي
في راية المولى الجميع يتوحد
وفي ظل شرع الله ننام ونقومي
وحنا لكم مثل الحسام المجدد
دون الوطن ما نلتفت للعلومي
أفضالكم على الوطن ما تعدد
وتاريخكم عند الجميع معلومي
شفنا الرخا اللي كل يوم يتجدد
أمن وأمانٍ بالبلاد محكومي
ولا علينا من هل الغل والحقد
بنياتهم باذن المولى مهدومي
ناسٍ تحوف دينها لكل مقصد
وبجرمها فاقت جميع الجرومي
وش ذنب طفل دمعته تجرح الخد
وهو ينتظر لبوه وقت القدومي
وش ذنب عذرا يتموها المقرد
من فقد واليها تشق الهدومي
يالله ياللي لك عبيدك تهجد
يالواحد المخلوق منشي الغيومي
يالله تبطل كيدهم ويتبدد
وترد كيد اللي لدينك خصومي
وتحفظ جزيرتنا من الحد للحد
وتعز راية طيبين السلومي
وختامها مني سلام مورد
على نبيٍ للخلايق رحومي
فراج محمد الطنباوي السبيعي