التجارب علمتني

لا إله إلا الله الواحد اللي نرتجيه
ما لغيره نتجه بالرجاوي والسؤال
نعبده لما يجينا يومنا اللي نحتريه
يومنا اللي لا حضر قدر علينا الارتحال
الزمان أخذت قسمي منه وأعطيت فيه
كلما جيته بحاله يقابلني بحال
وما تعودت اشتم الوقت ولا اشره عليه
حامد الله في زماني لو على الوقت مال
يكفي إني سلم من التجارب معتليه
طلت شيئاً ما يطوله جنيه ولا ريال
التجارب علمتني مدارات السفيه
وان لقيته في يمين الدروب انحر شمال
وما لقيت اقشر من الحاجة تسوق الوجيه
لو بلاها ما عرفنا مواقيف الرجال
علمتني من هو اللي ليا ضقت انتخيه
دللتني سكة النور في سود الليال
والله ان الجود راعيه وجهه يحتميه
ودك انك لا تفاولت يطلع لك بفال
والبخيل اللي من الجود ما تندا يديه
حنظله لا زاد منها ولا منها ظلال
ما لقيت اجهل من اللي ليا ضاقت يجيه
ويتحرى مدة المال من عباد مال
والله إني ما نهبت العرف نهبه وادعيه
الليالي علمتني ولو ما هي طوال
اشهد إني عشت عمري على كل الوجيه
ذقت فيه المارد الهمج والعد الزلال
مره احصل مناتي وانول اللي ابيه
ومره احمول الليالي على متني ثقال
واشهد إني نلت قسمي من الحب النزيه
اكذب أن كان الهوى قلت مالي به مجال
ساقني في سكة الحب فرحة والديه
من تحلى بالفضايل وحلته الخصال
محتوى زين العذاري وزينه محتويه
لا طرتلي صورته قلت لله الكمال
والله اني قبل أشوفه واعرفه والتقيه
ما اقتنعت بقصة المسك من دم الغزال
ولا اقتنعت بقول من قال قلبي مهتويه
ولا اقتنعت بلذة الشوق ودموع الوصال
لين حصلته على أول محطات المتيه
تلني واخلف طريقي وناداني تعال
ما دريت إلا وأنا مندفع من غير ليه
واتكلت وقلت يا الله عليك الاتكال
انعمي يا نفس بالحب ما دامه نزيه
وارتوي يا زهرة العمر بالعشق الحلال