ويوم خلدوا في نومهم جيت أنا كلي

محاولة رثاء لرفيقة دربي زوجتي الحبيبة رحمها الله وأسكنها فسيح جناته
إلى جنة الفردوس يا قمة إحساسي
إلى جنة الفردوس يا حيي ومللي
بكيتك بقلبي قبل عيني وقرطاسي
بكيتك بروحي يا جروحي ويا ظلي
رحلتي نهار وحل في جوفي إدماسي
بفرقاك ابد، ماظن الايام يصفن لي
تركتي رفيق العمر تطويه الاتعاسي
رحلتي ومن بفراقك اليوم يفطن لي
تصبّرت قدّام البشر تصرخ انفاسي
ويوم خلدوا في نومهم جيت انا كلي
فقدتك وكنتي تاج عز على رأسي
فقدتك بأمر اللي على الكون متعلي
سكنتي عروقي حب ما يقبل قياسي
ابد ما يفارقني بترحالي وحللي
تفاخرت بك ياروح روحي على الناسي
تباهيت بطباعك ولا شاركك خللي
اذا الناس معدنهم ذهب فأنتي الماسي
اذا الناس عشرتهم تعب قربك يسلي
فقدت التي لاسولفت تقعد عماسي
ولو عاشرن غيره اكيد انه يمللي
كتمتي غبون الوقت ما جاك هوجاسي
وقفتي معي يالبدر في عزي وذلي
أشوفه بفقدك يالغلى بان وسواسي
سلبتي جوارح فاقدك صار منشلي
من بغيبتك يقدر يعوّض لي إفلاسي
بلياك أنا ما ظن الأيام يا ونلي
مع فراق رأس المال دقّن الأجراسي
بدا عدّي العكسي بدا العمر ينفلّي
أنا مؤمنٍ صبّار بس الدهر قاسي
عسى الله يقوّيني وبلقاك يأذن لي