من روّع الأمن نبذناه محقور

الأرض أرضي مهبط الوحي والنور
فيها الحرم مكة وطيبة بلدنا
فيها رياض الخير والحكم دستور
ميزاننا القرآن والله حمدنا
من زار جده بدل الحزن بسرور
ونصف القمر نشتاق له لو بعدنا
جنوبنا من زارها صار مبهور
فيها الجمال بكل معنا وجدنا
شمالنا هايل وما هوب مغمور
واسع مجال وبالكرامة شهدنا
عدونا يا ناس والله مقهور
بالفعل جاوبنا ترى اللي نشدنا
حب الوطن في داخل القلب محفور
وأجدادنا تزرع وحنا حصدنا
أرسى ورسّى صايب الفكر والشور
عبد العزيز اللي بحكمة ركدنا
هذا البلد من نعمة الله منصور
حنا هل التوحيد لربي سجدنا
لو قلت مهما قلت ما نيب معذور
في شيخنا اللي يسمى فهدنا
حنكة سياسة زايد الخير مبذور
وإخوانه اللي هم أملنا وسندنا
عبد الله الخيّر نصى الناس بالدور
رجل السلام اللي يداوي رمدنا
سلطان صقر الجو والبحر مقدور
آمن وزال اللي يثّور نكدنا
نايف وقف لشرار ما عنده أغرور
ضلعٍ قوي بالصعايب رفدنا
سلمان ياللي بالعدل حيل مشهور
امير في ظله ورايه مددنا
نعم الرجل حليم ما هوب ممرور
كنّه أبونا أو بحسبة ولدنا
ادعي أنا ربي لهم ذنب مغفور
وتحفظ بلدنا من حسود حسدنا
رجل الأمن خط الوفا دم بسطور
وعم البلاد الأمن وحنا رقدنا
من الذي وكلك يا نذل مسعور
تنثر طعونك بالقفى في جسدنا
هل انت بخلق الله موكل ومأمور
ولا يهمك حزننا أو سعدنا
أفكار ودت الكثيرين حادور
وعيالنا ماتو وش اللي استفدنا
تحسب إذا فجرت بتصير مشهور
ولا إنت مسلم بس حنا فسدنا
خفاش ليل ومنت بارز ومنظور
مثلك وأشكالك ترانا زهدنا
حنا مع الدولة بواجب ومحذور
وبفعلكم هذا ترى مير زدنا
من روع الأمن نبذناه محقور
ونحاربه مهما بذلنا جهدنا
يجيبه الله نمسكه مثل عصفور
ويبان منهو ثعلنا من أسدنا
لا ما نخاف اللي تعود عل جحور
من فضل الله ثم قوة زندنا
ما قاله الله نتبعه وانتم قشور
قاله أبو متعب وقبله فهدنا