الفاجعة كبرى

يا دار عمت في نواحيك الاحزان
وعمت جميع الناس حضر وبوادي
ماجفت ادموعك على فقد سلطان
وتجددت من يوم نادى المنادي
ينعى رحيل اللي له الأمن عنوان
نايف ولي العهد راع المبادي
الفاجعه كبرى وهزت لها اركان
فقيدنا ذا اليوم ماهوب عادي
فقيدنا حقق لنا امن وامان
وصان العهود بعون رب العبادي
وفقيدنا رجل حليم وحنان
ماهوب متسلط حكيم وقيادي
امن المواطن هاجسه وين ماكان
وامن المواطن عند نايف ريادي
الأمن والأمان مطلب للاوطان
وامن الوطن في حكمته عم وسادي
نرفع تعازينا لسلايل اكحيلان
عبدالله اللي كلنا له انفادي
يا خادم البيتين حنا لك اعوان
وحنا جنودك بالرخا والشدادي
وكل العزا للوافي الشهم سلمان
نعم العضيد اللي سماته مدادي
حامي وطنا من حقود وخوان
قوة دفاع امكمل بالعتادي
وكل العزا للي خلف طير حوران
احمد يعد امن الرجال الشدادي
ابحنكته وبخبرته طول الأزمان
الآمن بإذن الله يسود البلادي
الموت حق ومالنا عنه مزبان
الموت حق وكلنا له انقادي
نرجوك يا رب الملا جود باحسان
ال نايف المحبوب يوم المعادي
وبجنة الفردوس تجزيه مسكان
ياالله يا المعبود ياخير هادي
يوسف عبدالرحمن الوهيب - عنيزة