سويتوا بدار الطهارات تفجير

الدين من قبل ألف وأربع مية عام
حنا هله ما فيه فتنة وتكفير
نقرأ ونكتب عن مشاهير الاسلام
ما حرفوا في فهم الأقوال تفسير
وإلا أنت ياللي بان تفكيرك السام
أثر عليك مغسل المخ تأثير
ياللي تسب أئمة الدين الاعلام
ما تخجل من الله ولا تسأل الغير
على هواك تقسم الأمة أقسام
وتصنف بكيفك هل الشر والخير
أعلنت لك فتوى وصدرت الأحكام
وحللت قتل المسلم بدون تبرير
جمعت لك شله ووزعت الألغام
شله نقاص عقول مدري مخادير
وضمنتوا الجنة على صكوك وأختام
وسويتوا بدار الطهارات تفجير
تقول ما باقي مساجد ولا إسلام
أفظع كلام صار فعلاً وبيصير
خوارج شذت ومن شذ ما دام
من شذ عن قول النبي في زمهرير
ما عندنا لهم غير تنفيذ الاعدام
والصلب والتشهير حداً وتعزير
ولا أحد يزعزع عزمنا وأمننا العام
وحنا على العدوان جند مغاوير
وحكامنا حكام بالشرع حكام
وحنا لهم جند تدك الطوابير
وحنا عليها كلنا درع وحزام
دار لها فالقلب حشمة وتقدير
والدين من قبل ألف وأربع مية عام
حنا هله ما فيه فتنه وتكفير