فهد عمود البيت

مصادر التخريب وعمال الارهاب
ناسٍ على الشعب السعودي دخيله
شرذمةٍ ما عندهم دين وآداب
وخذو لهم عن سكة الحق ميله
لهم هدف منبوذ بس الهدف خاب
ومخططات أفكارهم مستحيله
هندب لهم شيطانهم كل هنداب
مثل الخوارج بالعمل والفصيله
حنا عدو الدين نحسب له احساب
ونحايل المجرم بحيلٍ وحيله
وعلاجهم سيفٍ للأرقاب قصاب
الراس من بين المناكب يشيله
ما ضاع حقٍ طاردٍ فيه طلاب
وحنا وراهم والليالي طويله
المملكة حنا لها ستر وحجاب
في سترنا مثل الفتاه الجميله
دارٍ مشرفها الولي رب الأرباب
للناس قبله كل يومٍ وليله
وفعالكم يا أهل التطرف والأكذاب
حرام.. واجرامٍ.. وظلم.. وفشيله
ماهيب في سنه.. ولا هيب في كتاب
ولا هيب فالمذهب.. وسلم القبيله
ويش الهدف ويش الدوافع والأسباب
سفك الدماء الأبرياء ويش هيله
وباب الجهاد يعد من خير الأبواب
ما هوب بالتخريب.. والقتل غيله
شوهتوا الإسلام في كل الأقطاب
بفعالكم يأهل الردى والرذيله
وللي ينادي باسم الإصلاح كذاب
هذا هو الدجال مدري زميله
لو ناصره ثم شجعه كل نصاب
ما همنا الدجال وللي مثيله
لا تنخدع بفكارهم يا أخي الشاب
اعرف طريق الحق واسلك سبيله
جنب سبيل أهل الفتن عنك مجناب
مالك ومال مولعين الفتيله
أهل التطرف.. والتعصب.. والأنشاب
إللي يميل الحز بهم عزتيله
يأهل العقول الراشدة يا أولي الألباب
طاعة ولي الأمر فرض ونفيله
لا للتظاهر.. والتجمهر.. والإضراب
وسيلة الأوغاد.. بئس الوسيله
منهاجنا سنة محمد والأصحاب
نحكم بشرع الله ونتبع دليله
وعدونا لو كان يلدغ كما الداب
لا بد نقطع منه راسه وذيله
في خدمة الواجب شبابٍ وشياب
«هذا الوطن» لنا الشرف ننتميله
فهد عمود البيت والشعب الأطناب
والأمر شورى والتفاهم وسيله
وختامها ما بان نجمٍ وما غاب
صلوا على أفضل من سعى بالفضيله