حكامنا آل سعود.. ورث وسلالة

شاركت به حزت مجاله بلا من
اختار من جزله واجنب هزاله
أنظم على كيفي قوافيه وأوزن
ويا كثر غيري من بدع من جزاله
ماني لحالي واجد اللي بدعهن
بمناسبة عيد الفطر واحتفاله
صغت البيوت اللي ينومس غناهن
بديتهن باللي عزيزٍ جلاله
رب السما اللي خالق الإنس والجن
أجمل تهاني العيد بأول هلالة
على ملوك الدار والشعب يهدن
حق الوطن منا الوفا والجماله
غلاه في وسط القلوب متمكن
غربه وشرقه والجنوب وشماله
باسم الملوك اليعربية تسمون
حكامه آل سعود ورث سلالة
ديارنا في غيرهم ما يطيعن
الله يمدد لأبو فيصل لياله
عسا سنينه بامر ربي يطولن
فهد ملكنا لا فقدنا ظلاله
عمى الحريب ليا نوا الشر وأعلن
ويسلم ولي العهد مرخص حلاله
في سيدي كل المراجل يعدن
بابه مشرع يدخله من عنا له
قلبه وبيبانه لشعبه يهجن
يعد شعبه بالغلا من عياله
ابوٍ حنون وللمواقف يثمن
والنايب الثاني عسا العز فاله
مراجله بالطيب ما حصي عددهن
لا بين الحمل الثقيل ارتكاله
دايم ايدينه بالعطايا يمدن
عن الوطن جيشه يرد العياله
بأحدث سلاح تكنولوجي يدارن
حكم الشريعة ما ندور بداله
حكم بشرع الله والآيات يقرن
يا هني من يا لا اليتم بكفاله
وبيوت ربي من حلاله عمرهن
يا هني من يا صل ببوه وخواله
حبال وصله شدهن ما تراخن
كل على النية جزاه بيناله
كل سجله فيه الأعمال يحصن
وقت بدا جمره يزيد اشتعاله
بين لنا حقد القلوب المدفن
كم واحد بالسوء نوخ جماله
صملانه بشين النوايا يخضن
ساقه غلوه والجهل للضلالة
فكره له سنين على السو يشحن
أغواه شيطانه وصدق خياله
عقله ومرجلته من الدين خلين
ما عاد فرق بالحرام وحلاله
يمشي ولا يدري وش خطاه ياطن
حتفه على كتفه بلا عقل شاله
الزين هو والشين عنده تساون
ادعي جليل الملك ربي واساله
يكفي الوطن سوء النفوس المبطن
الله يكافينا الفتن والجهاله
عسى الفتن يا رب بامرك يموتن
وعداد ما عشب نبت في عباله
اوعد ما وقع طيور وطارن
صلاة رب البيت مرسي جباله
على النبي صليت واختم عددهن
إبراهيم بن عبدالعزيز سعد اليحيا/الدوادمي