بالدربيل

بعض الموظفين في شركة الكهرباء؟!
كلن تطور في هالشركات واسلوب تقديم الخدمة إلا شركة ها الكهرب.. موظف القطاع العام اذا كشر أحيانا بلعناها وسكتنا أما موظف الشركة اللي تراجعه علشان تقدم على طلب الحصول على الخدمة تنقهر اذا شفته ما يعطيك وجه وكأنك جاي تطلب الخدمة ببلاش، ياليت معالي الدكتور غازي يزور بعض ادارات الاشتراكات في المياه والكهرب على شان يشوف بعينه!!
***
مكتب اشتراكات المرسلات!!
راح والغى البيجر وبعد فترة جت له فاتورة البيجر راح يسأل الشركة وقالوا له ما الغيت البيجر المهم الغى له الموظف البيجر.. سأل الموظف طيب وش اسوي بالفاتورة.. رد عليه الموظف بدون ما يرفع راسه حتى رح سددها
هذا هو اسلوب العمل في مكتب الاشتراكات في حي المرسلات.
***
اجتماعات بعض المختصين
مشكلة بعض المختصين اللي يمثلون اداراتهم في لجنة أو اجتماع يضم أكثر من ادارة حكومية تعنى بموضوع واحد.. ان بعضهم يدخل الاجتماع وكأنه جاي من كوكب ثاني يعني اذا طلب منه مندوب الجهة الثانية بعض المعلومات قال والله ما أدري ياليت هالنوع من الموظفين يعرفون ان الهدف من أي لجنة أو دراسة أو نظام إنما هو لصالح الوطن والمواطن وليس لصالح ها الجهة أو تلك.عندما نصل إلى هذه القناعة ستكون النتائج أفضل مما يساهم في نجاح القرار.
***
بعض الموظفين!!
بعض ها لموظفين «أصلح الله حالهم» إذا رد على التليفون كنه يرد على تليفون بيتهم يقول: وش تبي ليش مكلم.. وشوله ياليت يدري هالنوع من الموظفين انهم يستلمون راتب مقابل الوظيفة وان الراتب الحلال يحتاج موظف على قدر من المسؤولية ينجز معاملات المراجعين بدون غضب أو منة!!.