أفكار دخيلة

يا بلادي من محبة ربنا لك يا بلادي
صار بك قبر الرسول وبيت مكة والمدينه
مهبط للوحي برضك بأمر من رب العبادي
وغير هذا نحمد الله في امان وفي سكينه
وللابد وان يسر الله في معزة وازديادي
في امان في سلام في يدي ناس امينه
في يدين ال سعود الامن فيك اليوم سادي
بالجنوب وبالشمال وغرب وشرق مجودينه
دون حدك يا وطنا نار من خشم الزنادي
انتبهنا عن غرقنا يا بلادي بالسفينه
والله انك غالية لك مسكن وسط الفوادي
وكل وافي من غلاك يشاركك مع والدينه
للامام يسير بك راع السياسة والقيادي
خادم البيتين جعل الله يطول في سنينه
فهدنا اللي بالشدايد ما يحسب للاعادي
كم عدو دون حدك قد لطم خشمه وعينه
لو اعد اللي يسوي ما حصيت الها عدادي
العلوم كثار والناس التاريخ مسجلينه
وابو متعب وابو خالد للفهد دايم سنادي
واحد يمشي يسار وواحد يمشي يمينه
ما عليهم من خراب اهل الفتن والاعتقادي
خاينين الدين كله والاسلام مشوهينه
زمرة ما فيهم اللي واصل سن الرشادي
جات بافكار دخيله جات باحقاد دفينه
لا وفا للدار فيهم ضايعين من المبادي
درستهم شلة حتى احذفتهم في كمينه
ويش ذنب الابرياء بالقتل واسلوب الفسادي
في بلاد شرعه القرآن والاسلام دينه
علموا من صيد منهم بالعلوم اللي وكادي
دارنا محمية برجال واسوار حصينه
وعلموهم كل واحد تايه مسراه غادي
ما نفعتهم خطة لاهل العقول اللي لعينه
وانشدوهم وش وراهم تطلع الناس الجدادي
لين حتى كل واحد يطلع اللي في خزينه
واحصدوهم حصد حب قارب منه الحصادي
ما وراهم غير شر للبلاد مبيتينه
مطلق بن صالع الحلفي المطيري