حلول اللغز

يا ويش بنت بالمهمة تنادي
عند الوعد لاصحابها تزعج الصوت
بنت ذكرها الله رب العبادي
بالاسم والا وصفها غير مثبوت
من صوتها تنظر لها باجتهادي
ومن اسمها تذكر بعد سيرة الموت.
واليكم الحلول الصحيحة:
أبدي بحمدالله خير المبادي
رب الخليقة كاتب الرزق والقوت
واهدي سلامي فل عنبر وكادي
للشاعر اللي ينظم اللغز في بيوت
لغز ابن موسى صار ظاهر وبادي
الساعة اللي تضبط الوعد ما يفوت
علي بن صاحب العمري
الرياض
يا الله يا محيي الميت الجمادي
وفي داخلي البحر غذيت للحوت
تسقي من النو الحقوق البلادي
تلبس روابي نجد من نبته بشوت
اللغز حله ساعة الوقت عادي
وقت لها اللي خايف الوقت لا يفوت
بدر بن خلف الحزيمي
سلام نفحه طيب عنبر وكادي
سلام للصفحة مدارات منعوت
قريت لغز حميد صعب وعادي
وحله ترى الساعة قبل وقتك يفوت
الحميدي شخير العنزي
القصيم
لغزك يا بن موسى بسيط وعادي
اموضحه يا حميد في جملة بيوت
ومن لا يعرف الحل هذاك غادي
ولا يميز بين بشته من الكوت
البنت معروفة بحضر وبوادي
الساعة اللي بالفجر تضرب الصوت
عبد الرحمن بن سعد بن غشام آل جناح
القويعية
عج العطر مع رايح النو كادي
للي لهم في صخر الأشعار منحوت
قريت لغز للسليمي سدادي
أبا ارمعه لو شوت افكارنا شوت
اتصحي اللي غارق بالرقادي
الساعة اللي من حجر تاخذ القوت
سلطان ماضي الهويملي الحربي
القصيم
يا مرحبا ترحيب لونه زبادي
ابيض ولابس ثوب لولو وياقوت
والساعة لعذرا عليها اعتمادي
ساعة لطاعة ربنا تزعج الصوت
صالح سفر العمري
يا مرحباً باللي إليا قال أجادي
شعرة ورر والا جواهر وياقوت
واللغز حله كان ماني بغادي
ساعة اليا حل الوعد ترفع الصوت
علي ناصر البدراني
يا مرحباً براع البيوت الجدادي
عدة طيورٍ غردن باجمل الصوت
وأقول حل اللغز علم وكادي
ساعة ولا تبغي تفاسير واثبوت
دخيل الله ناصر البدراني
الخبر
لغز السليمي جبت حله وكادي
حل صحيح وجبت له علم مثبوت
بنت على الميعاد دايم تنادي
ساعة منبه ما بعد فاتها الفوت
عبد الهادي فهاد العرجاني
الأفلاج النايفية
الليل مظلم لا تزيده سوادي
خله على ربك بها ذيل واتفوت
ومنبه الساعة ليا صار هادي
اكوارتز قطعة زمرد او ياقوت
محمد بن عبد الكريم الغزي
الزلفي
اللغز حله ما يبي له عنادي
من يوم ذكره جاء بعد سيرة الموت
الساعة اللي كل يوم تنادي
مع كل توقيت توقته لا يفوت
فارس حمدان العتيبي
القويعية
يا الله يا الي ويا خير هادي
يا منقذٍ ذا النون من داخل الحوت
يا محصي كل الخلايق اعدادي
في موقف للعرض كل به اسكوت
رحماك في يوم يجينا هجادي
في ساعة ما فيه ماء ولا قوت
سلطان سعود الملحم
الزلفي
يا صفحة جودك مع الوقت زادي
هذا جواب اللغز والوقت به فوت
ساعة اتنبه ثاقل بالرقادي
على الوعد حسب الطلب تزعج الصوت
فهد بن عقيل الطويان
بريدة
يا حميد بن موسى ترى اللغز جادي
في قوته والقافية ما بها فوت
الحل عندي واضح ما يعادي
من يوم شفته ذكرن حزة الموت
ركزت بالساعة وهذا مرادي
جاء ذكرها بكتاب من يرزق الحوت
أديب الجريش
الرياض
خذ,, حل لغزك يالسليمي وكادي
نرسل لكم حله,, قبل فايت الفوت
ساعة لضبط الوقت ماني بغادي
هذا الجواب اللي موكد ومثبوت
زهران عون الله المطيري
بريدة
نشكرك يا راع البيوت الجدادي
ابيات مبناها من الصخر منحوت
واللغز,, حله عندنا شي عادي
وأنا ابحل اللغز قدام لا يفوت
ساعة لضطب الوقت,, حله,, وكادي
وسميها يومٍ موكد ومثبوت
محمد صالح بن شويمس الحربي
بريدة
جيتك من اقصى الشوق متعب جوادي
لاجل المشاعر تحتصر فيك وتموت
عطها الامل لا تترك القلب غادي
ما فيه داعي يمضي الوقت ويفوت
عمر الهناء ساعة ولا له مزادي
اما ابذله والا انسحب عنه بسكوت
محمد عبد الله العسكر الحنيني
البكيرية
ساعة وتعطيك الخبر كل بادي
وقت محدد والحجر وسطها قوت
هذا ورب البيت هو خير هادي
اللي حفظ ذا النون في داخل الحوت
مرزوق أبو حسين العتيبي
الرياض
لغزك عرفته يالسليمي وكادي
وكتبت حل اللغز يا فلان ببيوت
حل صحيح ولا نقول اعتقادي
الساعة اللي للوعد تزعج الصوت
حماد جزاء هجاج الحنيني
ضرية
قريت لغز بالمواهب ايقادي
مثل البحر يسبح على موجه الحوت
اقرا به العلم الصحيح الوكادي
ساعة جرس يحيى بها الوقت ويموت
نافع الحربي
الرياض
لغز السليمي حله اصبح وكادي
عند الذي عليه الالغاز ما تفوت
الساعة اللي ما تذوق الرقادي
جواب لغزك والحجارة لها قوت
سعود بن عبد العزيز الوشيل
الزلفي
يا مرحبا حييت عنبر وكادي
ترحيبة تاصلك اسرع من الصوت
لغزك عرفته بالسليمي وكادي
ومن خاطري يا صاحبي جاك ببيوت
الساعة اللي في جرسها تنادي
انهض مع اول صوت لا يفوتك الفوت
سلمان حبيب المرزوقي
الزلفي
قم يا نديبي فوق جمس رمادي
اوصل جوابي قبل ميعادها يفوت
اوصل جواباً مغتذي بالوكادي
للي نشر بتراثنا لغز ببيوت
ترى هي الساعة ومنها استفادي
اكثر عباد منجي العبد من حوت
محمد بن عرده العنزي
الزلفي
يا صاحبي بيتك كما قطف كادي
لعزك جميل مدونينه على النوت
الحل ساعة ما عليها سوادي
مذكورة بكتاب من يضمن القوت
خالد سليمان الجريش
الرياض
يا حميد لغزك بين صعب وعادي
ولكن على الشعار ما يمكن يفوت
الساعة اللي للحضر والبوادي
ولكل شخص تعطي العلم بثبوت
ياما تدلك في دروب الرشادي
لاجل الصلاة ولاجل الاعمال بوقوت
محمد بن عبد العزيز الخنيفر
اشيقر
يا حميد لغزك عارفينه وكادي
لغز الفهيم اللي نظمها على بيوت
لغزك ترى الساعة دليل الفوادي
بما تشتهي يا حميد هي ترفع الصوت
فيحان زبار القسامي
عفيف
يا مرحبا ترحيبة كالزبادي
باللغز واللي حابكه داخل بيوت
والحل عندي يا فتى بالوكادي
هاذيك ساعة بالوعد تزعج الصوت
بندر بن عبد الله العريدي
الزلفي
يا مرحبا اعداد ما سال وادي
باهل التراث ومن حبك لغزه بيوت
ليا دقت الساعة وصارت تنادي
اصحا يا بن موسى قبل فوته الفوت
عبد الحكيم بن علي الطريقي
الزلفي
ياللي بلغزه فاد ثم استفادي
نعطيك حل اللغز موزون ببيوت
تنشد عن الساعة وعلمي وكادي
يا زينها تخدم ولا تطلب القوت
حنا اخترعناها ولا نيب غادي
في عهد هارون وذا العلم مثبوت
وسميها يوم الحشر والمعادي
اللي وصفه الله باوصاف ونعوت
عطا الله بن سليمان العطا الله
الزلفي
لغز التراث اليوم جاله منادي
من واحدٍ بالطيب والجود منعوت
لا شك حل اللغز عندي وكادي
بإذن الذي كافل لنا الرزق والقوت
الساعة اللي بالمنبه تنادي
ما تخلف الميعاد لا صار موقوت
ابراهيم محمد العبود
بريدة البشر
هات القلم واكتب بعلم وكادي
نصه لابن موسى ولاشٍ غذا فوت
الوقت مضبوط ولا شيف زادي
والا نقص مثبوت مثبوت مثبوت
مبارك محمد طرجم الضعاوين
وادي الدواسر
اهلا هلا بك عد ما سال وادي
او عد ما خط القلم داخل النوت
قريت لغزك في تراث البلادي
انا تراثي بحل الالغاز مبخوت
بنتك تراها ساعة من جمادي
اضبط لها التوقيت ثم تزعج الصوت
فيصل بن فهد الراضي
قصيباء
ياالله تهدينا طريق الرشادي
يا رب ما منجي نبيه من الحوت
عرفت حل اللغز علم وكادي
مولع به لوما يكسب القوت
ذي ساعة منبه عليها اعتمادي
يحتاجها اللي خايف وقته يفوت
مشاري خالد الدعجاني
شقراء
لغزك عرفته جد,, ما نيب غادي
لغز نسجته فيه لغات وبتوت
هذي هي الساعة ولا نيب غادي
ولها علامات تجي حق وثبوت
ومن اللحود الناس تطلع وكادي
يوم الصحف تنشر ولا بعدها موت
فهد المحمد السماعيل
اشيقر
البنت يا حميد السليمي جمادي
وتزعج لها صوتاً بتوقيت موقوت
تصحا لو انك في لذيذ الرقادي
على وعدها ما توفر ولا تفوت
ساكر بن الاشقح بن قعبوب
تراث الجزيرة فاح مسك وكادي
في صفحة خط القلم لغز مثبوت
ترحيبة للي في جوابه يقادي
وزن الشعر والحل راعيه مبخوت
وان كان ابن موسى غلبه الرقادي
ينوم والساعة تناديه بالصوت
عبد الاله بن حسن القعيري
المزاحمية
يا مرحبا باللي كلامه سدادي
يكتب لنا شعر جميل ومثبوت
البنت تنفع للعبادة وكادي
تنبه النوام في عدة ابيوت
مثل اسمها الساعة ليوم المعادي
اللي نجا فيها موفق ومبخوت
علي رشيد الرشيد
رياض الخبراء
سلام مني عد نادي المنادي
واعداد ما هل المطر وانبت نبوت
ازكى من العنبر وريح الزبادي
ولكل من احيا تراثه عن الموت
يا بن السليمي كان صاب اجتهادي
الساعة حل اللغز ودحيم مبخوت
دحيم الجلعود
سميراء
عرفت حل اللغز قول وكادي
وابا اكتبه من قبل وقته يفوت
ساعة منبه مقصدي والمرادي
في وقت امحدد لها تزعج الصوت
صالح عبد الله التميمي
الرس
يا حميد خذ مني جواب وكادي
في حل لغزك قبل لا يفوتنا الفوت
الحل في ساعة لاهلها تنادي
ليا ركدوا نغماتها بوقت مثبوت
عبد الله بن مبارك الجريدي
المزاحمية