المملكة أكبر من أية مكيدة

يوم الوطن ذكراه ذكرى مجيده
والمملكة من طبعها ديرة امجاد
في كل عام بالفخر نستعيده
يا الله عساه بخير يمضي وينعاد
في عالم برقه كثير ورعيده
مشحون وسطه بالخلافات واحقاد
بعيوننا ان شفنا لهيب الوقيده
حنا بعون الله على اهبة استعداد
كل يلاحظها ويكتب بقيده
يد بالقلم واليد الاخرى على زناد
والمملكة اكبر من اية مكيده
بيت بني باطناب واعماد واوتاد
بناه نطاح الصعاب الوليده
بصبر وكفاح ويرخص الروح بجهاد
أفعال أبو تركي شوامخ شهيده
كل يطالعها على روس الاشهاد
بهدي الرسول ومنهجه والعقيده
شعارها التوحيد ينفي للالحاد
متقاربه من بعض لو هي بعيده
منبع فخرها مصدره لامة الضاد
رجالها عند الامور الشديده
مثل الجبال الشامخه شم الاطواد
الشعب كنه منحدر من بديده
تحت الاوامر كلهم جمع وافراد
واليوم ننعم بالحياة السعيده
بعهد الفهد متريح حاضر وباد
بسياسته حنكه وامور سديده
لحل الصعاب الشايكه دوم معتاد
ومعاه ابو متعب عوين وعضيده
بالعدل والسيره مشى درب الاجداد
له سيرة في كل لحظه حميده
في كل يوم بالجزيلات يزداد
وسلطان ابو خالد علومه عديده
قوة وطنا في جهوده لها قاد
والشعب وافي والحكومه رشيده
ويوم الوطن له فرحة مثل الاعياد
في طلعة الميزان قلت القصيده
فخر بوطنا مالنا غيره بلاد