الأمير اللي عسى ربي يديمه

للأمير اللي عسى ربي يديمه
نحمد الله عالسلامه والتعافي
وانجلى همٍ على قلبي يهيمه
انتشى شعري وهاضن القوافي
يباركن لراع الوفا راع العزيمة
الحكيم ابن الشجاع ابن السنافي
الكريم اللي من أصولٍ كريمه
حر ياللي مضربه ماهوب شافي
من نوى به صارت ضلوعه هشيمه
فزعة المضيوم ملجاً للضعافي
والبلد من حكمكم صارت عظيمه
فعلكم عم الوطن ماهو بخافي
جالي الدمعه من عيون اليتيمه
نايف اللي للكرى عيا وعافي
ساهرٍ للأمن في رد الظليمه
نظّم رجال الأمن هم والمطافي
كافح اصحاب المخدر والجريمه
واستدام الأمن في مدن وفيافي
من بحر جده الى شرقي رحيمه
اشهد اني ماوصفتك صرت جافي
ماوصفتك ياندى الجود ونسيمه
وان حكينا في زمن ولى وطافي
سالفته جدودنا تحكي قديمه
كل رجالٍ على نفسه يخافي
ماينام وصاير كلّ غريمه
لين جاء عبدالعزيز الحر لافي
بالسعود اللي لهم عزٍ وقيمه
واعتلى في نجد بسيوفٍ رهافي
ويل من هو صايرٍ ضده خصيمه
وأذن المذن عقب ماكان خافي
الحكم لله أخو نوره يقيمه
الخطر ولى وصار الكل صافي
والبدو مع الحضر تسكن مقيمه
ربعت صحرى الظما والخير ضافي
والرخاء مزن نشأ وانهل ديمه
شعر: محمد بن إدريس الشكره