حلول اللغز

نشرنا في عدد الأسبوع لغزاً كتبه الشاعر المعروف ناصر بن عبدالله المسيميري من محافظة الرس وكان نصه:
ويش رجلٍ مبطيٍ ما صدفته
لو تبيّن.. يبين شوي ثمًّ يروح
له عيالٍ كثار ومن عياله عرفته
كل واحد بلون.. أظن يكفي وضوح
وقد حمل لنا«الفاكس» عشرات الحلول الصحيحة وبعد الفرز النهائي اكتملت الشروط في الحلول التالية:
يا هلا بك يا ناصر قوسك اليوم شفته
لو كميته لقيته يالوفي الطموح
إلى التقى نور شمسه مع مطرها كشفته
سبعة ألوان طيفه كل واحد يلوح
فهد بن عقيل الطويان - بريدة
يوم دمع السّحابه بالبسيطه ذرفته
بانعات الزّهور بكل روضٍ تفوح
أزهرت وسط روضٍ يبتسم يوم شفته
كنّها«ألوان طيفٍ» مع بعضها تلوح
عبدالله بن غازي الحنيني - الضلفعة
لغزك اللي ذكرته بالجزيرة عرفته
كل قوسٍ ملون بالسما في وضوح
بالمطر كد لمحته مثل منته وصفته
لا تطول غيابك يالصديق النصوح
سعد بن مويزر البدراني - الرس
يا نهار الوفا.. يا ريح وردٍ قطفته
منه ريح الشذا والطيب دايم تفوح
من عبيره رويت.. ولغز ناصر كشفته
قبل قوس المطر بالافق طيفه يلوح
فهد الجروان - الزلفي
حي لغزٍ قريته يوم شفته عرفته
مرحبا بك هلا عداد يرق يلوح
مع نزول المطر وجهه تبين وشفته
والقزح في مكانه للمشاهد وضوح
خليف الحربي - الرياض
يا المسيميري إسمع لغزك اللي وصفته
بالجزيرة تبي حله وعندك طموح
حل لغزك يا ناصر من سمانا قطفته
ذاك وقت المطر قوسٍ جميلٍ يلوح
محمد بن ناصر العريني - رياض الخبراء
لغزكم يا بوعبدالله بحكمه وصفته
كامل بالوصايف وافي بالشروح
المعاني قويه من خلاله كشفته
عدة ألوان سبعه وسط قوس تلوح
علي رشيد الرشيد - رياض الخبراء
شاقني اللغز ذا المره واظني عرفته
يوم صادف مطر وخيور زان المزوح
شفت خط الحيا متبين يوم شفته
جعل رب السما يمطر ويشفي الجروح
مبارك محمد بن طرجم الضعاوين - وادي الدواسر
شاعر الرس والالغاز لغزه كشفته
يوم جانا المطر والشمس شفته يضوح
يعجب العين شوفه حين بالعين شفته
يشبه القوس واسمه من حروفه يلوح
سعود بن شنار السهلي - الدرعية
لغز ناصر قريته شاقني يوم شفته
أشهد إنه حكيم ولا يبي له شروح
تعكس الشمس طيفه من لمحته كشفته
يوم هلّت مزون الصيف فوق السفوح
تركي بن أحمد القصير - بريدة
مرحبا فيك يا الشاعر ولغزك كشفته
وسط صفحة بنت للشعر مجد وصروح
اعرف«القوس» يا ناصر وبالحيل شفته
يوم هل السحاب ونور برقه يلوح
عطاالله بن سليمان العطاالله - الزلفي
لغزك اللي ذكرته للعرب ثم وصفته
وانت يا شاعر الالغاز رجل طموح
شفت قوس مشكل في السماء يوم شفته
شفت بعده بروق المزن قامت تلوح
عبدالهادي فهاد العرجاني - الأفلاج
قبل اكمل قرايه لغز ناصر كشفته
بين مثل نور الشمس ما هي مزوح
شفت ابو سبعه عيال امس واليوم شفته
جعل مزن السنه هاذي بروقه تلوح
مصلح بن ثاري العماري - عنيزه
حي ناصر ولغزه بان من يوم شفته
في تراث التطور والوفا والطموح
شكل قوس القزح عزالله انك وصفته
سبعة الوان عقب السيل تبدا تلوح
منصور بن عبدالله المجيدل - الرس
كاتب اللغز مرحب من غزيرٍ غرفته
في سما السحب يا ناصر جميل يلوح
سبعة ألوان يظهر في سمانا وشفته
قوس الألوان معروف ويكفي شروح
مشاري خالد الدعجاني - شقراء
مرحبا فيك يا ناصر ولغزك عرفته
لغز وارد وتال النظم زاده وضوح
ذاك بين السحاب بالعين شفته
بانت ألوان طيفه قام ضوه يلوح
عبدالعزيز بن حمود السرهيد - حائل
للجزيرة سلام.. وللمطر يوم شفته..
حل لغزك يا ناصر بالسما لو يروح
بالعدد سبعة أخوه.. عمرهم ما عرفته..
الله اللى خلقهم كلهم دون روح