نسناس الشمال

هب نسناس الشمال وذكّر المشتاق خله
ذكّره في ما مضاله واشغل القلب وسرابه
قمت اهوجس يا بدر والقلب كنه فوق مله
كل طاريٍ يجيه وكل هاجوسٍ عثابه
يا بدر ذكرت أنا اللي كامل زينه ودله
الهنوف اللي خذت قلبي بيمناها انهابه
اثر فعل الحب باهل الحب غربال ومذله
وعنا قلب المولع في هواء البيض وعذابه
صاحبي نجل العيون وسود الاهداب المضله
والخدود اللي كما وردٍ قراح الماء شرابه
والشعر لو جيت اوصف ضاع فيه الوصف كله
ليل مدري ذيل خيلٍ باللزز فك الطلابه
الله أكبر لارتمى فوق المتون وزان فله
فيه له هو خص مع زود الحلا قدر ومهابه
طيفها لا من طرالي يشلع القلب ويتله
تل دلوٍ تله الضامي وجاب اقصاه جابه
يا عسى هاك السحاب اللي نشا مشمل يعله
كل ما هلت سحابة خير تقفاها سحابه
وين مرسول المحبه يا بدر وصه وقل له
يا صله ويخبره ما صابني لحظة غيابه
وقل له اني لو بغيت اسلى دقايق وتدله
هب نسناس الشمال وزاد جرحي في صوابه