غرام

ألا يا نود عصر هب هب ودوب يطرق دوب
عليه هب لين الحب هب هب مع هباهيبه
يذكرني غرامٍ نوب أحسبني نسيته نوب
ونوب الله يكافينيه مدري ويش أسويبه
غرام اللي ليا مني تذكرته غدا بي صوب
أهوجس به وأهجر سبه من اللوعة وأهذريبه
غرام اللي عليه تقول قلبي فالضلوع يذوب
ما غير أهرف عليه هراف ذيبٍ في مراقيبه
ذبحني شيخ ترفات العذارى الشايمات العوب
عليه القلب هاجوس الوله يقبل ويقفي به
هذاك اللي سنا خده يشادي شعلة المشبوب
أبو نجلن سهمهن من يصيبه صابه مصيبه
وليلٍ مثل أشلة سابقٍ تهوي على المركوب
تنقض فوق مزموم النحر والنود توميبه
هجرني مير أنا بصبر وباصبر مثل صبر أيوب
هجرني مير أذن الله على ما قدر يجيبه
وأنا وإن كان من يمي تراني في رجا المحبوب
ولو مركب نجاني تاه في غبة غياهيبه
ولو إني عن اللي تاب قلبه عن هواي أتوب
وأكف النفس عن طرد التماني وأقبل الخيبه
ولكني تحت حكم القدر والحظ والمكتوب
وباكر يا عسى باكر يسر المنتظر غيبه