حلول اللغز

نشرنا في عدد الاسبوع الماضي لغزاً كتبه الشاعر فهد بن عقيل الطويان.. وكان نصه:
يا ويش بنت سر أبوها تذيعه
ماله لسان وطاوعت للاشاره
احوال ابوها من عرفها تطيعه
إلى جلس يمناه.. والا يساره
وقد وصلتنا عشرات الحلول واكتملت شروط النشر في الحلول التالية التي تنشر مرتبة حسب اولوية الوصول شاكرين لقراء الجزيرة تعاونهم وتواصلهم الذي يسعدنا كثيراً.
العود كم تاجر علينا يبيعه
واللغز مع حله تراها شطاره
البنت يالشاعر خفيفه سريعه
كمبيوتر أبوها وهي قيل فاره
عبدالله بن صالح الاطرش - الرس
عبر التراث اللغز دايم ربيعه
له مركز حافظ عليه بجداره
عندي حلول اللغز دايم سريعه
بالفكس لا حاسب ولا احتاج فاره
خلف أحمد الجوفي - جدة
الصفحة اللي دايم بالطليعه
صفحة تراث بكل فخر وجداره
ويا اللي كتبت بيوت شعر بديعه
اللغز حله كمبيوتر و«فاره»
عطا الله بن سليمان العطا الله - الزلفي
لك يا فهد مني تحيه وديعه
وطالبك تتكرم علينا بزياره
لغز طرحته في بيوت بديعه
كمبيوتر سموا له البنت فاره
علي غنام - رياض الخبراء
عندي حلول اللغز صارت طبيعه
وكل بمجهوده يجيب اقتداره
فاره مع الحاسب لسره تذيعه
هذا الجواب ومنك نبغى الزياره
هندي بن نابت الغياثات - الافلاج
اللغز رايع والمعاني بديعه
والخالدي حلي يجيله بداره
حاسب وبنته يا فهد له تبيعه
من سرعته لاهنت تعرف بفاره
عبدالله حمدي السويدي - الدمام
ارسل بيوت للجزيرة سريعه
فيها سلام مع جميل العباره
يا ابن عقيل اللغز حله رميعه
(الماوس) اللي لقبوها بفاره
علي رشيد الرشيد - رياض الخبراء
جتك الردود اللي لقينا سريعه
لاهل الوفا والطيب رهن الاشاره
فاره مع الحاسب تراها مطيعه
واللي يديره يتصف بالمهاره
محمد بن عبدالعزيز الخنيفر - اشيقر
هجسٍ لفى عقب الجفا والقطيعه
يا ما حلا وان شب بالليل ناره
ينخى الشوارد ثم تجي له مطيعه
ما احتاج له شاشة ولا احتاج فاره
فهد الجروان - الزلفي
سلام تعداد الزهر في ربيعه
لامن سقاه الغيث وبلٍ غزاره
الحل واضح والجزيرة تذيعه
للكمبيوتر (ماوس) به ازراره
فالح غازي الحربي - رياض الخبراء
اهلا هلا باهل النفوس الرفيعه
اهل الوفا والمعرفة والشطاره
الجود برجال الحمايل طبيعه
والحاسب الآلي تمشيه فاره
محمد عبدالكريم الغزي - الزلفي
اهلا هلا باللي بيوته بديعه
اللي جمع بالقاف فن ومهاره
جتني حلول اللغز جتني سريعه
ما احتاج انا حاسب ولا احتاج فاره
راشد بن ناصر الشقيق - الأسياح
والحل هو «فارة الكمبيوتر»
يا مرحبا بك يا حسين الطبيعه
لغزك ثقيل ونفهمه بالاشارة
كمبيوترن مخزون وسطه يذيعه
ما ينفتح يكون تجيب فاره