شوق المرايا

مدري علام الفرح ما له بقلبي نصيب
والناس يدله على طول المدى بالها
أعيش في غفلة الحاضر شعور الغريب
واغيب عن كل من حولي على اطلالها
وأشوفها باحتضار الشمس عند المغيب
وأذكر ربيعٍ نسى لونه على شالها
وأبكي بصمتٍ من أعماقي وجرحي عطيب
وتمر الأيام وهمومي على حالها
يا فهيد دامك من ديار الحبيِّب قريب
جب لي خبر.. من عيونه لو تعنَّى لها
خذ صورةٍ من خيالك في غياب الرقيب
وأغمض عيونك عليها وأحفظ أشكالها
وليا لفيت الوطن يا فهيد خلِّك لبيب
وأطلق عَنان الخيال وجر موّالها
هو يلثم الخاتم المحظوظ كفٍ خضيب
والاَّ تذوب المرايا شوق لاقبالها
والاَّ تناسى نجوم الليل كونٍ رحيب
وتهيم في شعرها المشغول في خالها
والاَّ ينام الخجل من فوق غصنٍ رطيب
ينثر حنانٍ يحسّه كل من جالها
أغار من كل حرفٍ زار ثغر الحبيب
وأغار من لثمة الشفَّة لفنجالها
وأغار من دمعها وقت الفراق العصيب
إليا التجت للوساده تشكي أحوالها
وأصيح مظلوم يا عالم ولا من مجيب
لو لاحت الكلمه بعينه ولا قالها
طاريه عندي يسبب رد فعلٍ عجيب
وله صورة في خيالي ما احدٍ طالها
الشاعر/ ماجد الشاوي