صحبة شرف مع أهل المعروف محسوبه

الرزق مضمون والآجال مكتوبه
بيدين رب البشر علام الأحوالي
الناس ما عندها خيرٍ ولا عقوبه
الخير والشر عند الواحد العالي
والله ما أجامل هبيلٍ ينفخ أذروبه
لو كان تاجر ويملك رؤوس الأموالي
ترى الردي لو كثر ماله ما غردوبه
ماحدٍ ذكر بالعواشز طلع وضلالي
الشري لو هو من الأنهار مشروبه
مرٍ مذاقه ولا يمكن يجي حالي
اللي ليا جيتله لقّاك عرقوبه
هذاك فرقاه عيد وتبعه اهبالي
واللي لبس ثوب يكشخ به ماهو ثوبه
تبي تقول العرب في عقله اخبالي
الفقر ماهوب في الرجّال عذروبه
كم تاجرٍ من صفات المرجله خالي
الرجل يقنعك منطوقه مع اسلوبه
ولاّ ترى به تشابه بين الأزوالي
رفيقي استر خماله واستر عيوبه
واقف معه لا تخلوّا عنه الأنذالي
أقوم في خدمته وأعطيه ما جوبه
حقٍ عليّه وأنا للطيب فعّالي
أبني الصداقه معه طوبه على طوبه
ما هيب صحبه مصالح ما لها تالي
صحبة شرف مع أهل المعروف محسوبه
اللي يثمّن مواقفنا فهو غالي
واللي ليا جيت يمّه يقضي النوبه
أصبّ له من دلال الكيف فنجالي
هذاك والله رفيقي وأتبع دروبه
لو غاب عني يجي دايم على بالي
مثايلٍ بالذهب والماس مصبوبه
أخذتها من تجارب ناس عقّالي
هذا وأنا عبدك اللي مكثر ذنوبه
يا الله تجعل لنا بحماك منزالي
أرجو ثوابك وعطفك وأرجي التوبه
وإن كان ما نلت عفوك عزّي لحالي
وصلاة ربي عدد ما هلّت نصوبه
على محمد عدد ما هلّ همّالي
الشاعر/ سهل بندر العتيبي