لوحة

يا آخر الدرب خلصني من أولته
لازلت احايلْك وأمالي هي أمالي
والجرح شلته وبعده مثل ما شلته
راح أكثر العمر ضيعته من هبالي
ما بين حملٍ ثقيل وحلمٍ أولته
واللي يزيد اقْهري ويقطَّع اوصالي
بالقلب نصف الحكي للحين ما قلته
أحاول أرقى عن الذكرى وترقالي
أحاول اقرب من النسيان ما طلته
يا فاخر الحسن من حدوك عذالي
هانت عليك الدموع وجرحي اهملته
وتركتني في مهب الشوق ولحالي
بلا وداع وعليك الدمع سيّلته
ارد مني العزا عني وتبرالي
قطعان حزني حنين القلب واسألته
قلبي ويبقى العتب وان قال لك غالي
من وين جبته شف ولا وين وصّلته
يا طاير الشوق وش جابك على جالي
رميت عشك على جرحي وثقّلته
فتحت بابٍ يجيب الريح في بالي
وشلون مدري؟ وانا يا دوب قفلته
شفني بنصف الدرب والآخر قبالي
لا قادر أرجع ولا لي في مواصلته
تقول دربك وعر وأقول عزالي
اشوف يومك تبي بيديك سهلته
الشمس نامت وبانت وحشة التالي
يا آخر الدرب رجعني على اولته
أسعد الروابة