الشاعر/ عبيد بن فالح أبو جراح أبو ثنين

عندي خبر

اطرد هواجيسي بنظم القصايد
وارتاح لا مني نظمت القصيده
واختار من زين المثايل فرايد
اشفق على الجزله واحب الفريده
عندي خبر اللي ورى الناس كايد
من قبلنا قالوه واليوم اعيده
عمري قضى بين الرجاء والوعايد
ورجواي بالمعبود رازق عبيده
رب الملا حكمه على الخلق سايد
نريد والله فاعلٍ ما يريده
اهموم قلبي دارسات وجدايد
ولا راحت الأولى بدلها جديده
تحدنا شيماتنا والعوايد
ولا خير في رجل بليا عقيده
والرجل يعرف موقفه فالشدايد
وقفات طيبه له تزود رصيده
والا الرخوم رخوم ما من فوايد
لا هيب فايتك ولا مستفيده
اشفق على رفقة وسيع البنايد
اللي ربوعه شوفهم يوم عيده
رجل المواقف فالمهمات قايد
عزمه قوي وأرياه دايم سديده
يفداه نمام هروجه سرايد
فظهور خلق الله سيوفه حديده
من الزمن عفنا وشفنا النكايد
الغوج يربط والجحش فك قيده
ياللي تحسب القل لوم ونقايد
كم من فقيرٍ عاش عيشه سعيده
والنذل لو عنده ترى المال زايد
غناة مثله هي ترى اكبر نقيده
الدين فرقاب النشامى قلايد
والمال لو جانا يدينا تبيده
والله لو نرقد بليا وسايد
الذي ما ترضاه نفسٍ عنيده
والوقت لو فينا طعونه لهايد
ما نشتكي جور الطعون اللهيده
نصبر اللين أنحط وسط اللحايد
حياة عزٍ أو وفاة شهيده
وصلاة ربي عد طبع الجرايد
على نبي الحق صفوة عبيده