يا الله يا رحمن يا سامع الصوت

رثاء في والدتي - عليها رحمة الله -:
نبي نموت ونترك الحي للموت
روح تروح وروح تلحق باثرها
ما حدٍ بها الدنيا من الموت مفلوت
والنفس بيد اللي خلقها قدرها
لابد من يوم به العبد مزتوت
جوف اللحود اللي تهول حفرها
عمر الفتى يفنى ولو طال موقوت
عند الولي مكتوب والله ذكرها
بكيت باعلى الصوت والفكر مشتوت
والنار شبت بالضماير سعرها
من حال ما قالوا خذ العلم مثبوت
هزَّ الخبر روحي وكبدي جمرها
على فراقٍ ما معه صبر وسكوت
أمي غناتي سعد عيني نظرها
له منزلٍ ما بين الأضلاع منحوت
حفرت صورتها بفكري خبرها
الهمّ يبرى الحال والحيل مفتوت
واللّي عرف ما صاب حالي عذرها
القلب حنّ ونّ والصدر مكموت
مصيبة خلّه على الله جبرها
عزي لمنهو من عنى الوقت مكبوت
ورجله عن المسيار تالي قصرها
ترى الحظيظ اللّي من الناس مبخوت
اللي عن السيات نفسه قهرها
يفطن لحاله من قبل فايت الفوت
ومما تشوف العين ياخذ عبرها
يا الله يا رحمان يا سامع الصوت
يا خالق المخلوق باحسن صورها
مشكاي يا ملجاي عن كل شاموت
تجلى عن النفس الحزينه كدرها
واطلب عسى قبره من الروض منبوت
يفوح ريح أزهارها من شجرها
يا مخرج ذا النون من باطن الحوت
في جنة الفردوس تقطف ثمرها
وصلاة ربي عد ما خط بالنوت
على النبي المصطفى مختصرها
الشاعر/ فهد بن عبدالعزيز الرميان - بريدة