آخر أحزانه

يا خالق خلقه عزيز الجلالي
الله وحده مالجينا لغيره
محيي نبات الارض مزنٍ همالي
يا عالم باجيال كل البريره
يا محصي خلقه وهو فوق عالي
يوم الخميس وصاب شبه الجزيره
هم وحزن في فقد رمز الرجالي
يا الله طلبتك والليالي مديره
ترحم فهد يا رب تقبل سؤالي
مرحوم يا جابر قلوب حسيره
مرحوم يامن حزت زين الخصالي
مرحوم يامير علا به نظيره
للطايله تمشي وترقى العوالي
تمشي وكل افعالكم بالسريره
وتطلب بها وجه الولي لك منالي
قولة هلا عندك لشعبك بشيره
يشفى بها من هو من الوقت بالي
يابو هلا تبكيك شبه الجزيره
وتبكيك عربانٍ شكو فقد غالي
وتبكيك عين اللي من الله ضريره
وتبكيك عين ايتام ناس خوالي
وتبكيك عين كحلتها الستيره
من فقدكم يامير بالدمع سالي
ما ينبكى الا من ينومس مسيره
ولا يفقد الا نادر بالعيالي
حرٍ ولد حر على في مطيره
روس الجبال وماكرة ما ينالي
حرٍ رسم في صفحة المجد سيره
سيرة وفا واخلاص مع طيب فالي
فعلك ينومس كل درب تنيره
وفعلك لنا تذكار يابن الرجالي
وارفع تعازي قلوب ناس كسيره
لبو فهد سلمان وافي الخصالي
يابو فهد والله فقدناه حيره
والله فقدنا من يشيل الثقالي
فقده على حبه علينا كبيره
فقده كسر قلبٍ من الهم خالي
يا الله عسى من كلنا نستخيره
يرحم فهد يارب مفقود غالي
مطلق عبدالله الحصان آل عمار الدوسري الافلاج