محاورة الأسبوع

جرت هذه المحاورة بحضور الأمير فيصل بن خالد بن عبدالعزيز رائد شعر المحاورة وذلك في قصره العامر بالمعذر وهي بين الشاعرين احمد الناصر الشايع وسلطان الهاجري.
أحمد الناصر:
سلام الله عدد سود الليالي وبيض الأيامي
على فيصل ولد خالد من أولها لتاليها
وصل فضله ومعروفه من الهند ليا الشامي
على الاجناب والاصحاب قاصيها ودانيها
سلطان :
هلا يا مرحبا بك بالنيابة والهدف سامي
الحنها واهجرسها وارددها واغنيها
اشوف النور قدامي واشوف النجم قدامي
وانا اقول الثقيلة مالها يا كود راعيها
أحمد :
عسى عيدك تعوده يا ولد خالد مية عامي
واقول وطلبة الله تازن الدنيا وما فيها
نبي نبدا السوالف والسوالف سوقها حامي
وطيب السالفة من طيب رجال بدافيها
سلطان:
آمين الله يدوم وجودهم حكام الاسلامي
جبال كل ما هب الهوا تذري مذاريها
تهيض يا أحمد الناصر وقد الخام بالخامي
ليا شبيت نارك يعلم الله ما نطفيها
أحمد:
حلمت البارحة حلم عساك تفسر احلامي
حلمت ان الجبال ازوال تمشي فوق رجليها
يباريهم ثمان عيال ذا جايع وذا ظامي
ولا تاكل ولا تشرب ولا ادري ويش محييها
سلطان:
صدق حلمك وانا شلت الرصاص الحر بحزامي
والا حققتها بالعين زانت لي مراميها
اثر فرعون يوم انه بنى له في مصر الاهرامي
يسوي له سوايا ماحد غيره يسويها
أحمد :
اظن الصحف طويت وجفت كل الاقلامي
عسى ربي يعود فالمياه الى مجاريها
أحد يحكم بحكم أبيض واحد في حكم الاعدامي
واحد ما يفهم الواجب واحد ياخذ ويعطيها
سلطان:
انا وانته وردنا الجمه اللي تروي الظامي
ولا يمديك تذبحها ولا يمديك تحييها
اختيار/ ناصر بن إبراهيم العريج