كرت عبور

عديت في راس الطويله دون كرت للعبور
أصافح مزوني بكفاً واتحرى مدها
لا سال حبري يلطم وجيهٍ تهاب من الظهور
ويصفّي الكلمه ويروي كل من جا عدّها
واللي روى مني طمع..! ما قال كلمات الشكور
باني بيوته بالردى والطيب جاه ايهدّها
اكتب مع جنون المشاعر حرف لا يمكن يبور
وبحور شعري فارقه في جزرها مع مدّها
هذا من اسباب الشعر.!! وإلا من اسباب الشعور
اللي ليا خضّب يدين الطرس بيّح سدّها
أزريت لا آلقى في وجيه الناس بالغربه سرور
لا سلّمت لي عينها جرّح سلامي خدّها
بيدي بنادق للعنا ترمي فشقها فالصدور
تقطع شرايين الخفوق وترتجي بك ودّها
ياهيه يوم اقفيت عني لا وفيّ ولا نكور
مقفي وذي رابع سنه من الغياب أعدّها
وشلون ترجع وانت مالك في تواريخي حضور
ترمي لي طعونك عمد ما فاد يوم اصدّها
وينك قبل تلقى عداي بغيبتك فيني كسور
وينك قبل يلبس وفاي الضيقه ويعتدّها
وينك وأنا أعيش العمر وارجي كفن أهل القبور
وينك وأنا اطرد صورة الماضي معك واحدّها
وينك وأنا أعيش الضياع اللي بنى فيني قصور
وينك ونا عمري صقورٍ جور صدك هدّها
القاسمية